Taýarlardyń ulttyq katalogi ne úshin kerek

ASTANA. KAZINFORM — Úkimet basshysy Oljas Bektenov taýarlardy óndirýdiń barlyq protsesin baqylaıtyn ulttyq katalog engizý jumysyn jedeldetýdi tapsyrdy.

— Memleket basshysy ekonomıkanyń barlyq salasyn tsıfrlyq transformatsııalaý mindetin qoıdy. Kórip otyrǵanymyzdaı, saýda salasynda júıeli jumys júrip jatyr. Taýarlardy tolyq qadaǵalaý jáne sáıkestendirý aıasynda taýarlardyń ulttyq katalogi engizilip jatyr. Bul taýarlardy óndirýden nemese ákelýden bastap, kóterme jáne bólshek saýdada ótkizýge deıingi barlyq kezeńdi jikteýdiń negizi, — dedi Oljas Bektenov Úkimet otyrysynda.

Premer-mınıstrdiń aıtýynsha, «Astana-1» jáne «Elektrondyq shot-faktýralar» aqparattyq júıesiniń qyzmeti ıntegratsııalandy. 

— Alaıda, taýarlardy tsıfrlyq qadaǵalaýdyń qoldanystaǵy júıesi ónimderdiń shekteýli sanatyn ǵana qamtıdy jáne ár jerde bólek-bólek ornalasqan anyqtama men derek formatyna súıenedi. Osyǵan baılanysty qarjy jáne saýda mınıstrligi basqa da memlekettik organdarmen birlesip, taýarlardyń ulttyq katalogin barlyq salada engizý jumystaryn kúsheıtý qajet. Bıznesti osyǵan belsendi túrde atsalysýǵa shaqyramyn, — deıdi ol.

Buǵan deıin Oljas Bektenov taýardy tańbalaýdyń mańyzdylyǵyn kásipkerlerge túsindirý jumysy júrgizilmeı jatqanyn aıtqan edi.