Taýarlardy baqylaýdyń úsh deńgeıli modeli iske qosylady

ASTANA. KAZINFORM –  Bul qandaı model jáne ol qalaı jumys isteıtini týraly OKQ alańynda ótken baspasóz konferentsııasynda Qarjy vıtse-mınıstri Áset Turysov aıtyp berdi.

Onyń aıtýynsha, joǵarǵy deńgeı — bul sanattar saqtalatyn taýarlardyń, jumystardyń jáne qyzmetterdiń Jalpy jikteýishi (mysaly, «keńse taýarlary» sanaty). Ortasha deńgeı — bul keńse taýarlaryna kiretin zattar (mysaly, qalam, oǵan biregeı NTIN kody beriledi jáne sáıkesinshe kartada qalam, óndirýshi týraly jáne t. b. aqparat bolady). Tómengi deńgeı — belgili bir partııa tańbalanatyn taýarlardyń belgili bir túrleri boıynsha tańbalaý (mysaly, qalamdar sany).

— Árbir taýardyń óziniń ómirlik tsıkli bar: ol ne shetelden elge ákelinedi, ne Qazaqstan ishinde óndiriledi. Tıisinshe, árbir taýarǵa — kedende nemese Qazaqstan ishinde NTIN beriledi. Eger shetelden ákelinse, GTIN-men ıntegratsııa bar. Bul aqparattyń barlyǵy memlekettik derekter bazasynda jınaqtalady, sodan keıin barlyq salalarda qoldanylady: memlekettik satyp alýlarda, shot-faktýralarda, chekterde, — dep túsindirdi spıker.

Katalog qazirdiń ózinde fıskaldyq derekter operatorlarymen baılanysty. Qazirgi ýaqytta bazada 15 mln taýar bar. Kún saıyn ıntegratsııalanǵan operatorlardan 10 mıllıon chek týraly málimetter kelip túsedi. Bıznespen ıntegratsııalaý úshin 11 API qyzmeti iske asyryldy. Áset Turysovtyń aıtýynsha, bul taýar aınalymynyń ashyqtyǵyn, sapa men jaramdylyq merzimin baqylaýdy, kontrafaktige qarsy kúresti qamtamasyz etedi.

Aıta ketelik 9 qazaqstandyq kásiporyn Qytaıdyń tamaq ónimderine jatpaıtyn taýarlar tizilimine endi.