Taýardyń shyǵý tegi týraly sertıfıkat qazaqstandyq kompanııalarǵa jylyna 300 mln. teńgege deıin únemdeýge múmkindik beredi - QR saýda-óndiristik palatasynyń vıtse-prezıdenti
ALMATY. Mamyrdyń 18-i. QazAqparat /Erbol Azanbek/ -Almatydaǵy Qazaqstannyń saýda-óndiristik palatasynda sarapshy-aýdıtorlar men ónimniń shyǵý tegi týraly sertıfıkat máseleleri jónindegi mamandar, taýar sarapshylaryna arnalǵan semınar ótip jatyr,
dep habarlaıdy QazAqparat.
Esterińizge sala keteıik, 2009 jylǵy qazannyń 23-nen bastap, taýardyń shyǵý tegi týraly sertıfıkatty berý aımaqtyq saýda-óndiristik palatalarynyń quzyryna berilgen bolatyn. QR Saýda óndiristik-palatasynyń vıtse-prezıdenti Ǵalym Amanjolovtyń aıtýynsha, QR Saýda-óndiristik palatasy aıyna 5 myń sertıfıkat beredi. Onyń 74 paıyzy - TMD, 13 paıyzy - Evroodaq elderiniń taýarlary. Ǵalym Amanjolovtyń paıymdaýynsha, taýardyń shyǵý tegi týraly sertıfıkat kompanııalarǵa qarjy únemdeýge múmkindik beredi. Máselen «Arselor Mıttal Temirtaý» AQ jylyna on myńdaǵan dollar únemdeıdi. Al jalpy alǵanda qazaqstandyq kompanııalar sertıfıkattyń kómegimen jylyna 300 mıllon teńgeden astam qarjy únemdeıdi. Sondyqtan shet elge taýar shyǵarýshy kompanııalar arnaıy sertıfıkat alýy tıis. Bul rette Evroodaq elderine taýar shyǵarý úshin «A» formaly, TMD boıynsha «ST-1» sertıfıkat beriledi. Sertıfıkat Qazaqstan kompanııalary úshin tegin beriledi. Búgingi tańda aımaqtarda sertıfıkat berý máselesimen 80 maman jumys isteıdi. «Olardyń bilimin jetildirip otyrý QR SÓP-tiń basty mindeti. Osy baǵytta semınarlar jıi ótkizilip turady. Búgingi semınar da osy baǵyttyń jalǵasy», deıdi Ǵalym Amanjolov.
Búgingi semınarǵa Reseıdiń saýda-óndiristik palatasynyń Quqyqtyq-kelisimshart departamenti dırektorynyń orynbasary Sergeı Radıonov qatysyp, Reseıdegi sertıfıkat berilý joldarymen bólisti. Onyń aıtýynsha, Qazaqstanmen salystyrǵanda Reseıde sertıfıkat 1000-1500 rýbl aralyǵynda aqyly túrde beriledi.
