Taýardy tańbalaýdaǵy tsıfrlyq kod baǵasy qansha bolmaq

ASTANA. QazAqparat - Taýarǵa arnalǵan tańbalaý kodyn japsyrýdyń shekti baǵasyn Úkimet bekitedi. Bul týraly búgin "Taýarlardy tsıfrlyq tańbalaý jáne qadaǵalaý" halyqaralyq forýmynda QR Indýstrııa jáne ınfraqurylymdyq damý mınıstri Jeńis Qasymbek aıtty, dep habarlaıdy QazAqparat tilshisi.

«Taýardy tańbalaýdaǵy tsıfrlyq kod baǵasy sezimtal máselelerdiń biri. Qazirgi ýaqytta «Saýda qyzmetin retteý týraly» Zańǵa tańbalaýdaǵy tsıfrlyq kod baǵasynyń shekti kólemin aıqyndaý boıynsha QR Úkimetine ókilettik berý bóligine ózgerister engizý máselesi qarastyrylyp jatyr», - dedi mınıstr.

Onyń aıtýynsha, shyǵarylǵan taýarǵa arnalǵan tańbalaý kodyn japsyrý baǵasy ilki joba júrgizýdiń qorytyndysy boıynsha anyqtalady. Baǵany anyqtaý barysynda óndiristiń erekshelikteri eskeriledi.

«Ony aıqyndaýdyń negizgi faktorlary mynalar: óndiris kólemi, óndiristik jaraqtandyrylý deńgeıi, áleýmettik mańyzy bar taýarlar tobyna jatqyzylýy. Tańbalaý kodynyń shekti baǵasyn esepteý shekti baǵany esepteý ádistemesi negizinde júzege asyrylady. Tańbalaý kodynyń naqty baǵasy Úkimet tarapynan bekitiledi» ,- dedi Jeńis Qasymbek.