Taýardyń jarnamadaǵy baǵasy men dúkendegi baǵasy arasynda aıyrmashylyq bolsa, ne isteý kerek

ASTANA. KAZINFORM – Taýarlardy jarnamalaǵanda bir baǵa kórsetilip, al satyp alýshyǵa dúkenge kelgende basqa baǵa aıtsa, tutynýshy quzyrly organǵa júginip quqyǵyn qorǵaı alady.  

Ortalyq kommýnıkatsııalar qyzmeti alańynda ótken baspasóz máslıhatynda «Sońǵy ýaqytta jarnamada kórsetilgen baǵamen dúkendegi naqty baǵa arasynda naqty baǵa aıyrmashylyq baıqalady. Jarnamada baǵa arzandaý kórsetilgenimen satý kezinde baǵa edáýir joǵary bolyp shyǵatyn jaǵdaılar jıilep ketti. Osy olqylyqtyń aldyn alý jáne jarnamadaǵy baǵanyń shynaıylyǵyn qamtamasyz etý úshin qandaı baqylaý jáne retteý tetikteri qarastyrylǵan» degen saýal qoıyldy.

Suraqqa Saýda jáne ıntegratsııa mınıstrligi tutynýshylardyń quqyǵyn qorǵaý komıteti memlekettik saıasatty qalyptastyrý basqarmasynyń basshysy Erkebulan Taǵashev jaýap berdi.

- Qazir osy baǵytta jumys istep jatyrmyz. Jalǵan jarnamaǵa qatysty Ákimshilik-quqyqbuzýshylyq kodekste 157-shi bap bar. Ótken jyldyń basyna deıin bul másele salyq organdarynyń quzyretinde boldy, olar jumysty durys atqarmaǵannan keıin bizge berildi. Búginde biz jergilikti organdarǵa tapsyrmalardy joldadyq, osy sekildi másele týyndap jatsa, jergilikti departamentke aryzdanýǵa bolady. Bul jalǵan jarnama bolyp sanalady, aryzdyń qasynda dáleldeıtin materıaldar, ıaǵnı foto, vıdeo dáleldemelerdi qosyp jiberýge bolady, - deıdi Saýda jáne ıntegratsııa mınıstrliginiń ókili.

Onyń aıtýynsha, fakti rastalǵan jaǵdaıda Ákimshilik-quqyqbuzýshylyq kodeksi aıasynda shara qoldanady.

Aıta keteıik, jyl basynan beri 2,2 mlrd teńgege tutynýshylardyń quqyǵy qorǵaldy.