Taýar tańbalaryn tirkeý men qorǵaýda qandaı ózgeris bolady
NUR-SULTAN. QazAqparat – Parlament Májilisiniń jalpy otyrysynda «Eýrazııalyq ekonomıkalyq odaqtyń taýar belgileri, qyzmet kórsetý belgileri jáne taýarlar shyǵarylǵan jerlerdiń ataýlary týraly shartty ratıfıkatsııalaý týraly» zań jobasy maquldandy, dep habarlaıdy QazAqparat tilshisi.
Shartta Eýrazııalyq ekonomıkalyq odaǵynyń taýar belgilerine jáne taýarlary shyǵarylǵan jerlerdiń ataýlaryna quqyqtyq qorǵaýdy berý tártibi, ótinim berýshiler men quqyq ıelenýshilerdiń quqyqtary, sondaı-aq tıisti ótinimderdi qaraý kezinde ulttyq patenttik vedomstvolardyń ózara is-qımyl jasaý tártibi kózdelgen. Osy Zań jobasynyń maqsaty - taýar tańbalaryn jáne taýar shyǵarylǵan jerlerdiń ataýlaryn tirkeý men qorǵaýdyń óńirlik júıesin qurý.
«Kórsetilgen obektilerdi tirkeýdiń óńirlik júıesin engizý Eýrazııalyq ekonomıkalyq odaq týraly shartta kózdelgen (Qazaqstan Respýblıkasynyń 2014 jylǵy 14 qazandaǵy № 240-V Zańymen ratıfıkatsııalanǵan). Bul júıeniń artyqshylyǵy bir qorǵaý qujatyn bes memlekettiń aýmaǵynda bir ýaqytta alý múmkindigi bolyp otyr. Ónerkásiptik menshik obektilerine qatysty tıisti qorǵaýdy alý úshin eń mańyzdy faktorlardyń biri berilgen ótinimniń basymdyq kúni bolyp sanalady. Bul júıe bir ótinim berý arqyly bes memlekette bir basymdyq kúnin belgileýge múmkindik beredi», - dedi QR Ádilet mınıstri Marat Beketaev.
Onyń aıtýynsha, shartty ratıfıkatsııalaý ulttyq taýar belgileri ıeleriniń quqyqtaryn shektemeıdi, sonymen birge eýrazııalyq naryqqa baǵdarlanǵan otandyq taýar óndirýshilerdiń quqyqtaryn qorǵaý deńgeıin arttyrýǵa múmkindik beredi.
