Taýar sapasyn retteıtin jańa ulttyq standarttar engiziledi - Úkimet otyrysy

NUR-SULTAN. QazAqparat –QR Saýda jáne ıntegratsııa mınıstri Baqyt Sultanov tutynýshylardan jıi shaǵym túsetin salalardy atady, dep habarlaıdy QazAqparat tilshisi.

«Tutynýshylar shaǵymdanatyn suraqtar jyldan-jylǵa qaıtalanyp keledi. Bul – kommýnaldyq turǵyn úı sharýashylyǵy, bólshek saýda, medıtsına, týrızm, kólik, baılanys salalary.

Mınıstrlik táýelsiz uıymdardy tarta otyryp, tutynýshylardyń quqyqtaryn qorǵaý máseleleri boıynsha áleýmettik saýalnama júrgizgen. Saýalnamanyń nátıjeleri boıynsha, el turǵyndarynyń basym narazylyǵy kelesi salalarda kórsetilgen. Medıtsınalyq qyzmetter - 46 protsent, baılanys qyzmetteri – 36 protsent, qalalyq qoǵamdyq kólik – 36 protsent», - dedi ol Úkimet otyrysynda.

Vedomstvo basshysynyń aıtýynsha, atalǵan salalarda tutynýshylardyń quqyqtaryn qorǵaý boıynsha júıeli problemalar qordalanǵan. Osyǵan baılanysty tutynýshylardyń quqyqtaryn qorǵaý júıesin transformatsııalaý bastalǵan kórinedi. Bul reformada tutynýshylardyń quqyqtaryn qorǵaý júıesimen tyǵyz baılanysty tehnıkalyq retteý men standarttaý máselelerine basa kóńil bólinip otyr.

«Qazirgi ýaqytta taýarlardyń sapasy men qaýipsizdigine arnalǵan 3 myńǵa jýyq ulttyq standarttar ázirlengen. Alaıda olardyń qoldanylýy belgili bir salalarda tómen. Jyldan-jylǵa ótinishter men shaǵymdar sany artyp kele jatqan ekonomıka salalaryna erekshe nazar aýdarý qajet. Sonymen qatar, atalǵan salalarda tutynýshylardyń taýarlar men qyzmetterdiń sapasy, qaýipsizdigi boıynsha qanaǵattanýyn qamtamasyz etý úshin jańa ulttyq standarttardy ázirleý jáne qoldanystaǵy ulttyq standarttardy ózektendirý qajet. Salalyq memlekettik organdar normatıvtik-quqyqtyq aktilerde ulttyq standarttarǵa silteme paıdalaný qajet. Bul – tutynýshylardyń quqyqtaryn qorǵaýdy qamtamasyz etetin mańyzdy aspekt», - dedi mınıstr.