Taýar sapasyn qalaı anyqtaý kerek - mamandar keńesi
QOSTANAI. QazAqparat - Qostanaı oblysynda dúken sórelerindegi ónimderdiń arasynda sanıtarlyq-epıdemıologııalyq talaptardyń buzylýy eń kóp qus etterinde anyqtaldy, dep habarlaıdy QazAqparat tilshisi.
Oblystyq Qoǵamdyq densaýlyq saqtaý departamenti ónimderdiń qaýipsizdigin qamtamasyz etý maqsatynda dúkenderdegi taýarlardyń tehnıkalyq reglamentterge sáıkestigine monıtorıng júrgizdi.
«Aı saıyn ónimderdiń qaýipsizdigine monıtorıng jasalady. Mysaly, byltyr tamaq ónimderiniń jáne azyqtyq emes taýarlardyń 3579 synamasy satyp alyndy. Zerthanalyq zertteýlerdiń qorytyndysy boıynsha olardyń 306-sy nemese 8,6% EAEO tehnıkalyq reglamentteriniń talaptaryna jáne Keden odaǵy komıssııasynyń sheshimimen bekitilgen sanıtarlyq-epıdemıologııalyq jáne gıgıenalyq normatıvterge sáıkes bolmaı shyqty», - dedi Departamenttiń tehnıkalyq reglamentter talaptarynyń saqtalýyn baqylaý bóliminiń basshysy Natalıa Ahmetova agenttik tilshisine.
Osy joly zerttelgen synamalar boıynsha da talapqa saı emes taǵamdar anyqtaldy. Atap aıtqanda, sút ónimderiniń - 18,2%, ettiń - 13,7%, qus etiniń - 27,3%, balyqtyń - 15,0%, maıdyń - 7,2%, shyrynnyń - 9,6%, kondıterlik ónimderdiń - 5,6%, kókónister men jemisterdiń - 6,1%, alkogolsiz ónimderdiń - 3,0% jáne alkogoldi ónimderdiń 4,1% talaptar saqtalmaǵan.
«Tehnıkalyq reglamentterdiń talaptary kóbine mıkrobıologııalyq kórsetkishterge baılanysty. Aıta ketý kerek, ónimderde nemese taýarlarda ishek taıaqshalary tobyndaǵy bakterııalardyń bolýy, jalpy bakterıologııalyq tuqym sebýdiń asyp ketýi, kógerý, ashyp ketý, óndirýshilerdiń tańbalaý qaǵıdalaryn saqtamaýy talaptardyń buzylýyna ákep soǵady. 2018 jyly jalpy somasy 619 myń teńgege 1416 keli qaýipti ónimder satylymnan alyndy. Qaýipti ónimderdiń 323 kelisi qatty turmystyq qaldyqtar polıgonynda joıyldy», - deıdi bólim basshysy.
Anyqtalǵan tártip buzýshylyqtardy joıý úshin kásipkerlerge 90 uıǵarym berildi, ákimshilik quqyqbuzýshylyq týraly 48 is qozǵalǵan.
Osyǵan oraı, departament oblys kásipkerlerine taýar satqanda uqypty bolýǵa shaqyrady.
Sonymen, taýar sapasyn qalaı anyqtaý kerek? Kez kelgen ónimniń sapasyzdyǵyn bildiretin belgilerge mynalar jatady: konservilerdiń isinip ketýi, oramanyń buzylýy (maıysqany, úzilgeni, synǵany), lastanýy, bóten qospalar, bógde ıis, jaramdylyq merziminiń kórsetilmeýi, tańbalanýdyń bolmaýy.
Mamandardyń aıtýynsha, atalmysh belgilerdiń bolmaýy taýardyń qaýipsizdigin bildiredi.
Qostanaı oblysy Qoǵamdyq densaýlyq saqtaý departamenti oblys turǵyndaryna azyq-túlik satyp alý kezinde erekshe zeıin aýdarýdy suraıdy.
«Ónimderdiń qaýipsizdigi boıynsha talaptar buzylǵan jáne ózge de faktiler anyqtalǵan jaǵdaıda belsendi bolý qajet. Kez kelgen adam taǵam satyp alǵanda buzýshylyqtardyń naqty faktileri bolsa, ony foto nemese beınejazbaǵa túsirip alǵany durys. Qaýipti ónimderdi satyp alsańyz, taýar túbirtegin saqtańyzdar. Árdaıym aýmaqtyq Qoǵamdyq densaýlyq saqtaý basqarmalaryna júginýge bolady», - deıdi Natalıa Ahmetova.
