Taýar bırjalaryn shaǵyn kásipkerlik sýbektileriniń sanatynan shyǵarý kerek – agenttik

ASTANA. QazAqparat – Taýar bırjalaryn mıkro jáne shaǵyn kásipkerlik sýbektileriniń sanatynan shyǵarý oryndy. Mundaı bastamany Básekelestikti qorǵaý jáne damytý agenttigi kóterdi, dep habarlaıdy QazAqparat tilshisi.

Agenttikten atap ótkendeı, keler jylǵa deıin shaǵyn kásipkerlik sýbektilerine baryp tekseris júrgizýge moratorıı jarııalanǵan. Bul shara ásirese mıkro bızneske jaǵdaı jasaý maqsatynda engizildi.

«Alaıda, qazir jumys istep turǵan taýar bırjalarynyń kópshiligi 2010 jyly qurylǵan. Máselen, byltyr olardyń ortasha jyldyq tabysy 250 mln teńgeden asty. Kásipkerlik sýbektilerin belgilengen sanattarǵa jatqyzýdyń qoldanystaǵy krıterııleri taýar bırjalaryna júrmeıdi. Atap aıtqanda, Kásipkerlik kodeksine sáıkes, memlekettik qoldaý kórsetý jáne Qazaqstan Respýblıkasy zańnamasynyń ózge de normalaryn qoldaný maqsatynda eki ólshem paıdalanylady: jumyskerlerdiń ortasha jyldyq sany jáne ortasha jyldyq tabys. Qyzmetkerlerdiń jyldyq ortasha sany on bes adamnan aspaıtyn jaǵdaıda taýar bırjasynda jasalatyn mámileler somasy ondaǵan mıllıard teńgeni quraıdy. Bul rette jyldyq ortasha tabys 30 000 AEK-ten asýy múmkin», - delingen qujatta.

Agenttik málimetinshe, taýar bırjasynda jasalatyn mámileler boıynsha kóbiniń jyldyq tabysy belligengen mólsherden birneshe ese asyp ketip jatady.

«Mysaly, «Estaý» taýar bırjasy» AQ-nyń qarjylyq eseptiliginen kórinip turǵandaı, qyzmetkerler sany 7 birlik bolǵanda, bir jyl ishinde taza paıda shamamen 200 mln teńgeni (65 000 AEK-ten astam) qurady. Bul rette, Astana qalasy Esil aýdanynyń prokýratýrasy tekserý júrgizip, taýar bırjasynyń qyzmetine qoıylatyn biliktilik talaptaryna sáıkes kelmeıtini jáne lıtsenzııalaý normalarynyń buzylǵanyn anyqtady. Byltyrdan beri taýar bırjalary qyzmetiniń zańnama talaptaryna sáıkes kelmeýine baılanysty 12 sýbektiniń lıtsenzııasy toqtatyldy», - dep jazylǵan konsýltatıvtik qujatta.

Bul máseleniń sheshý joly retinde agenttik taýar bırjalaryn mıkro jáne shaǵyn kásipkerlik sýbektileri sanatynan shyǵarýdy usynyp otyr.

«Taýar bırjalaryn mıkro jáne shaǵyn kásipkerlik sýbektileri sanatynan shyǵarý - moratorıı uzartylǵan nemese bolashaqta shaǵyn kásipkerlikti damytý úshin jaǵdaılardy jaqsartý sheńberinde tekserý is-sharalaryn júrgizýge moratorıı engizilgen jaǵdaıda da, belgisiz adamdar tobynyń múddelerin ýaqtyly jolyn kesýge jáne qorǵaýǵa múmkindik beredi», - dep túsindirme bergen sheshimge.

https://legalacts.egov.kz/npa/view?id=14698103