Taýar bırjalaryna joǵary talaptar engiziledi - Májilis
ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine taýar bırjalary máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Bul qujat Parlament depýtattarynyń bastamasy boıynsha ázirlendi.
«Eger taýar bırjalary ashyq jáne erejeler boıynsha jumys istese, ekonomıkada mańyzdy ról atqarady. Memleket basshysy Joldaýynda bırjalyq taýarlarǵa ashyq baǵa belgileýdi qalyptastyrýdy tapsyrdy. Bul zań jobasy osy tapsyrmany oryndaý úshin ázirlendi jáne birqatar naqty máseleni sheshedi», - dedi Májilis depýtaty Ekaterına Smyshlıaeva.
Zań jobasynda standartty aýktsıondy jáne standarttalmaǵan taýarlardy bırjalyq saýdadan shyǵarý, standarttalmaǵan taýarlar saýdasyn elektrondyq saýda alańdaryna aýystyrý, taýar bırjalary jumysynyń qarjylyq turaqtylyǵy men ashyqtyǵyna qoıylatyn talaptardy arttyrý usynyldy.
Sonymen qatar, qujat aıasynda taýar bırjalaryna qatysty memlekettik baqylaýdy keńeıtý, bırjalyq saýda-sattyqta óz isin adal atqarmaıtyndardyń tizilimin engizý, brokerler men klırıngtik ortalyqtardy lıtsenzııalaý jáne olardy qarjy monıtorıngi sýbektileri sanatyna qosý eskerilgen.
Munymen qosa zań jobasynda áleýmettik taýarlar boıynsha saýda jasaıtyn taýar bırjalaryna joǵary talaptardy engizý qarastyrylǵan.
