Taýar bırjalary otandyq bıznesti jyl saıyn 1 trln teńgeden qaǵyp otyr – Premer
Premer-Mınıstr Álıhan Smaıylov Úkimet otyrysynda taýar bırjalaryna memleket artqan senimniń aqtalmaǵanyn aıtyp, saladaǵy kemshilikterdi atady, dep habarlaıdy Kazinform.
«Qazirgi tańda Qazaqstanda astyq, munaı ónimderi, kómir jáne basqa da taýarlardyń saýda-sattyǵyn jasaıtyn 10 taýar bırjasy bar. Biz bırjalyq saýdaǵa úlken úmit artyp keldik. Sońǵy 5 jylda zańnama 2 ret ózgerdi. Soǵan qaramastan, bırjalar áli kúnge deıin naryqtaǵy óz qyzmetin tolyqtaı oryndaı alǵan joq», – dedi Premer-Mınıstr.
Sondaı-aq Á. Smaıylov jer qoınaýyn paıdalanýshylardyń taýar bırjalaryn óz múddelerine qaraı paıdalanyp ketkenin atap ótti.
«Búginde bırjalyq saýdanyń negizgi bóligi jergilikti qamtýdy saqtaý týraly mindettemeleri joq mámilelerge qyzmet kórsetýge baǵyttalǵan. Saldarynan jyl saıyn 1 trln teńgeden astam qarajat bizdiń bızneske jetpeı qalady. Bulaı bolmaýy kerek. Jer qoınaýyn paıdalanýshylardyń satyp alýlary el múddesine jumys isteýi tıis», – dedi Úkimet basshysy.
Premerdiń aıtýynsha, taýar bırjalary mıkrokásipkerlik nysanyna jatqyzylǵandyqtan salyqty az tólep, tekserýlerden ońaı qutylyp otyr.
«Jalpy, anyqtalǵan kemshilikterdiń barlyǵy jańa zańnama sheńberinde joıylýy tıis», – dedi Álıhan Smaıylov.
