Taýar baǵasy tek ulttyq valıýtamen kórsetilýi tıis – Qarjy mınıstri

ASTANA. QazAqparat – QR Premer-Mınıstriniń orynbasary - Qarjy mınıstri Erulan Jamaýbaev dúkendegi kez kelgen taýardyń baǵasy ulttyq valıýtamen kórsetilýi tıistigin aıtty, dep habarlaıdy QazAqparat tilshisi.

Aıta keteıik, áleýmettik jelide jáne buqaralyq aqparat quraldarynda elordadaǵy saýda oryndarynyń birinde azyq-túlik baǵasy teńgemen emes rýblmen kórsetilgeni týraly aqparat taraǵan bolatyn.

Búgin Úkimet otyrysynan keıin BAQ ókilderi mınıstrge osyǵan qatysty saýal qoıǵan edi.

«Arnaıy qadaǵalamaımyz. Eger mundaı jaıt oryn alsa, onda mán-jaıdy anyqtaıyq. Degenmen, qatelik bolǵan sııaqty. Bizdiń ulttyq valıýtamyz – teńge. Barlyq baǵa, taýardyń quny ulttyq valıýtamen kórsetilýi tıis. Eger mundaı fakti oryn alsa, onda ol - zańsyzdyq», - dedi Erulan Jamaýbaev.

Sonymen qatar ol valıýtalyq retteý Ulttyq banktiń quziretine kiretindigin aıtty.

«Biraq, bárimiz de patrıot bolýymyz, zańdy saqtaýymyz qajet. Zańǵa sáıkes, ulttyq valıýtamyz – teńge. Eger mundaı faktiler (taýar baǵasy ózge eldiń valıýtasynda kórsetilse) bolsa, mundaı zańsyz barlyq áreketti, onyń ishinde sol dúkenniń qyzmetkerleriniń áreketin tııamyz», - dedi Qarjy mınıstri.