Taýar baǵasy kassada ózgerse, ne isteý kerek
QYZYLORDA. KAZINFORM – Dúken sóresindegi baǵa men kassadaǵy qunnyń sáıkes kelmeýi – tutynýshylar jıi tap bolatyn máselelerdiń biri. Mundaıda satýshy taýardy qaı baǵa boıynsha satýy tıis? Kazinform tilshisi zańnamada bul jaǵdaıǵa qatysty qandaı talaptar kózdelgenin zerttep kórdi.
QR Saýda jáne ıntegratsııa mınıstrliginiń Qyzylorda oblysy boıynsha Saýda jáne tutynýshylardyń quqyqtaryn qorǵaý departamenti málimdegendeı, saýda obektileriniń ákimshiligi baǵa aıyrmashylyǵyn kóbine tehnıkalyq sebeptermen túsindiredi.
- Atap aıtqanda, taýardyń qaıta baǵalanýy, qysqa merzimdi aktsııalardyń aıaqtalýy nemese baǵa belgisin ýaqytyly aýystyrmaý sekildi jaǵdaılar sebep bolýy múmkin. Zańnamaǵa sáıkes taýardy saýda sóresine naqty baǵasy kórsetilgen baǵa belgisimen ornalastyrý jarııa oferta bolyp sanalady. Bul satýshynyń kórsetilgen sharttar boıynsha kez kelgen tutynýshymen satyp alý-satý shartyn jasasýǵa daıyn ekenin bildiredi, - delingen habarlamada.
Tutynýshylardyń quqyqtaryn qorǵaý týraly zańnyń 24-baby 12-tarmaǵyna sáıkes satýshy taýardy saýda obektisiniń ishki jáne (nemese) syrtqy vıtrınalarynda baǵa belgisimen kórsetilgen quny boıynsha satýǵa mindetti. Al tutynýshynyń taýardy osy baǵa boıynsha satyp alýǵa quqyǵy bar.
- Osyǵan baılanysty baǵa belgisindegi jáne kassadaǵy qun arasynda aıyrmashylyq anyqtalsa, tutynýshy taýardy sórede kórsetilgen baǵa boıynsha satýdy talap ete alady. Sonymen qatar quqyqbuzýshylyqty dáleldeý úshin baǵa belgisi men kassalyq chekti fotoǵa túsirip alý, sondaı-aq pikirler men usynystar kitabyna tıisti jazba qaldyrý usynylady. Eger satýshy tutynýshynyń zańdy talabyn oryndaýdan bas tartsa, azamattar quqyqtyq kómek alý jáne óz múddesin qorǵaý úshin mekemege júgine alady, - dep habarlady departament.
Sondaı-aq eGov.kz memlekettik portaly arqyly «E-Ótinish» aqparattyq júıesimen resmı ótinish joldaý qarastyrylǵan.
Buǵan deıin biz áleýmettik jelide jumys berýshini synaý qyzmetkerdi birden jumystan shyǵarýǵa quqyq bermeıtinin jazdyq.