«Taý Júrek»: 100 myń qazaqstandyq taýdaǵy qaýipsizdik erejelerin tegin meńgerdi
ASTANA. KAZINFORM — Týrıstik aǵynnyń artýyna baılanysty taýdaǵy oqys oqıǵalar sany shamamen 30%-ǵa ósken. Kóbine taýǵa daıyndyqsyz barǵan jastar zardap shegedi.
Balalardy qorǵaý halyqaralyq kúni qarsańynda Almatyda «Taý Júrek: Bıik mádenıet» atty biregeı transformatsııalyq joba iske qosyldy. Aýqymdy bastama Prezıdenttiń «Taza Qazaqstan» ekologııalyq aktsııasyn qoldaý maqsatynda uıymdastyryldy. Joba komandasynyń basty maqsaty — ekologııalyq aǵartýdyń aıasyn keńeıtip, eldiń 100 myń turǵynyna taýdaǵy qaýipsizdik, eko-etıka jáne taý mádenıeti týraly bazalyq bilim berý boldy.
Jobanyń avtory — Qazaqstan alpınızm jáne sporttyq quzǵa órmeleý federatsııasynyń prezıdenti, qoǵam qaıratkeri Nursultan Shoqanov. Onyń sózinshe, bul bastama dál qazirgi kezeńde erekshe ózekti, sebebi óńirde mańyzdy «Almaty taý klasteri» jobasy júzege asyrylyp jatyr. Infraqurylymnyń damýy taýǵa kelýshiler sanyn arttyrýda, sondyqtan taý mádenıetiniń deńgeıi de soǵan saı bolýy qajet.
Máseleniń ózektiligin statıstıka da dáleldeıdi: týrıstik aǵynnyń artýyna baılanysty taýdaǵy oqys oqıǵalar sany shamamen 30%-ǵa ósken. Kóbine 14 pen 23 jas aralyǵyndaǵy daıyndyqsyz jastar zardap shegedi. Tek 2025 jyldyń tolyq aıaqtalmaǵan kezeńiniń ózinde qutqarýshylar 69 ret zardap shekkenderge alǵashqy medıtsınalyq kómek kórsetýge májbúr bolǵan.
«Taý Júrek» baǵdarlamasy jappaı týrızmge degen kózqarasty ózgertip, ony sanaly ári qaýipsiz baǵytqa burýdy kózdeıdi. Bul — uzaqmerzimdi joba. Ol túrli kezeńderde balalar úıiniń tárbıelenýshilerin, mektep oqýshylaryn, stýdent jastardy, sport qaýymdastyǵyn, blogerlerdi, jýrnalısterdi, pedagogter men memlekettik organ ókilderin biriktirip, bıikke degen qurmet mádenıetin megapolıstiń jańa ómir salty retinde qalyptastyrýdy maqsat etedi.
Jaýapkershilik marshrýtyna alǵash bolyp qoldaýdy erekshe qajet etetin jandar — «Solnyshko» balalar úıiniń 50 tárbıelenýshisi shyqty. 28 mamyr kúni olar alǵashqy tanymdyq taý joryǵyna attandy. Qaýipsiz týrızmniń qandaı bolýy kerektigin kórsetý maqsatynda Federatsııa buryn-sońdy bolmaǵan súıemeldeý tobyn uıymdastyrdy: 50 balaǵa 10 pedagog, 5 kásibı gıd, dáriger jáne Qutqarý qyzmetiniń mamandary birge bardy.
— Bul joba «Taza Qazaqstan» jalpyulttyq naýqanynyń tek aınalany tazalaý emes, minez-qulyqty júıeli tárbıeleý men jańa ekologııalyq mádenıetti qalyptastyrý ekenin dáleldeıdi. Taý kezdeısoq adamdardy qabyldamaıdy, al naǵyz bıikke tek tártip pen týǵan jerge degen qurmet arqyly jetýge bolady, — deıdi uıymdastyrýshylar.
Buǵan deıin Almaty oblysynda qutqarýshylar taýda joǵalyp ketken 2 balany izdep tapqanyn jazdyq.
