Taý-tasty kezgen eski kólikter: 30 elden jınalǵan avtoekspedıtsııa qatysýshylary Óskemenge keldi
ÓSKEMEN.KAZINFORM – Chehııa astanasy Pragada bastalǵan «Mongol Rally» halyqaralyq avtoekspedıtsııasy Óskemende aıaqtaldy.
13 shildede Pragadan jolǵa shyqqan avtoekspedıtsııa qatysýshylary 10 myń shaqyrymnan astam jol júrip, ondaǵan eldi basyp ótti. Bul marafonnyń basty ereksheligi — tehnıkaǵa qoıylatyn talaptarda. Ár avtokólik 30 jyldan eski, shaǵyn kólemdi jáne alys saparlarǵa jaramsyz bolýy tıis. Qatysýshylar GPS pen uıymdastyrýshylardyń kómeginsiz jolsyz jerlerdi, shól men taýdy óz kúshterimen eńserip shyqty.
Avtoekspedıtsııaǵa Eýropa, AQSh, Kanada, Avstralııa men Pýerto-Rıko syndy 30 elden kelgen 100-den astam komanda qatysty. Jolda tehnıkalyq aqaýlarǵa baılanysty keıbiri mejeli jerge jete almady.
Osylaısha, Óskemenge shamamen 80 komanda kelip jetip, shahar turǵyndary erekshe áserli fınaldyń kýási boldy.
— Qatysýshylar úshin bul jaı ǵana sport emes, naǵyz rýhanı ekspedıtsııa. Al Óskemen úshin — ózin álemdik deńgeıde tanytyp, óńirdiń sulýlyǵyn kórsetýge zor múmkindik, — dedi ShQO Týrıstik aqparat ortalyǵy basshysynyń orynbasary Talǵat Dáýletov.
Aıta keteıik, avtosherý barysynda jınalǵan qarajattyń bir bóligi qaıyrymdylyqqa baǵyttalmaq.
— Qatysýshylardyń basym bóligi — Ulybrıtanııadan. 273 adamnyń 82-si sol elden. Biz Londonnan kelip, Shyǵys Qazaqstan sııaqty ásem óńirge jetkenimizge qýanyshtymyz. Bul naǵyz shytyrmanǵa toly sapar boldy. Bizdiń kólikter — ásben eskirken, tot basqan, ári motor daýysy qatty shyǵady. Biraq árbir shaqyrym umytylmastaı este qaldy, — deıdi brıtandyq qatysýshylardyń biri.
Eske salsaq, Máskeýden shyqqan týrıstik-tanymdyq ekspedıtsııa Qyzylordaǵa kelgenin jazǵanbyz.