Dımashtyń chellendji: Mektep dırektory «Golden Ticket» jeńip aldy
ALMATY. KAZINFORM — Jaqynda Dımash Qudaıbergen «Taý ishinde» ánine beınebaıan túsirip, arnaıy chellendj jarııalaǵan edi.
Kúni keshe Almatyda ótken fan-kezdesýde dál osy baıqaýdyń jeńimpazy anyqtaldy.
Chellendjdi jas túlektermen birge «Taý ishinde» ániniń bıin qaıtalaǵan ustaz utyp aldy. Astana qalasy № 58 mektep-gımnazııasynyń dırektoryna ánshiniń anasy óz qolymen «Golden Ticket» tabystady.
— Men óte qýanyshtymyn. Bul № 58 mektep oqýshylarymen birge túsirilgen chellendj. Birlesken jumystyń nátıjesi. Alla qalap, Eýropaǵa joldama utyp aldyq. Bul — Eýropanyń kez kelgen qalasynda ótetin Dımashtyń kontsertine joldama. Bul tek 1 adamǵa berildi me, álde oqýshylarǵa da joldama berile me — ony uıymdastyrýshylar qosymsha baılanysyp, habarlaımyz dep aıtty. Ázirge qalaı bolary naqty belgisiz. Ázirge Dımashtyń Londonda ótetin kontsertine baramyz dep josparlap otyrmyz. Áli de aqyldasamyz, — deıdi «Búgin LIVE» baǵdarlamasyna onlaın baılanysqa shyǵyp, suhbat bergen Aqmonshaq Nurtaza.
Mektep dırektory úzdik atanǵan beınematerıaldyń qalaı túsirilgenin aıtyp berdi.
— 24 mamyr kúni keshke jas túlekter is-sharasynan keıin oqýshylar úılerine qaıtyp bara jatqan jerinen aıaq astynan túsirdik. Negizi aldyn ala balalardy daıyndaǵan joqpyz. Biraq 2 kúnniń ishinde Instagram-da 3,5 mıllıondaı qaralym jınaldy. Al TikTok-taǵy qaralym sany 3 mıllıonnan asty. Ártúrli paraqshalarda jınalǵan jalpy qaralym sany 10 mıllıonnan asady, — deıdi jeńimpaz.
Ustaz Dımash Qudaıbergenniń anasynan «Altyn bıletti» alǵan kezdegi áserimen bólisti.
— Dımashtyń anasynyń qolynan «Altyn bıletti» alǵandaǵy áserim keremet. Biraq Dımashtyń ózimen kezdese almadym. Esesine, Dımashtyń anasynyń batasyn aldyq. Bizdiń mektebimizge degen jyly lebizin bildirdi. Osyndaı alyp, batyr anadan osyndaı júlde alý — men úshin úlken mártebe, — deıdi ol.
Aıta keteıik, keshe ótken fan-kezdesýde ánshi Nıý-Iorktiń áıgili Madison Square Garden kesheninde «Stranger» kontsertin ótkizetinin habarlady.
Odan bólek, Dımash Qytaı telearnasy kórsetetin ánshiler baıqaýynyń prodıýseri bolmaq.