Taý shańǵysy týrızminiń kirisi jaǵajaı týrızminen 5 ese joǵary
ALMATY. 3 shilde. QazAqparat - Almatyda 2010 jyldyń jeltoqsanynda iske qosylǵan «Medeý-Shymbulaq» taý shańǵysy kýrorty jobasynyń jalpy quny 30,8 mlrd. teńgeni quraıdy.
Onyń qarjylandyrý kózderi «Qazkommertsbank» (15 mlrd.) pen «Qazaqstan damý banki» (15,8 mlrd.) AQ boldy. 200 adamdy turaqty jumys ornymen qamtamasyz etken bul joba respýblıkadaǵy týrızmniń damýyna tyń serpin berdi. Onyń aıasynda Medeý men Shymbulaqtyń arasynda saǵatyna 2 myń adamdy tasymaldaýǵa múmkindigi bar 4572 metrlik aspaly jol salyndy. Onda jolaýshylar 8 jáne 4 oryndyq 114 kabınamen 6 m/s. jyldamdyqpen 14 mınýtta dittegen jerine jete alady. Álemdegi jetekshi taý shańǵysy kýrorttary arasynda 2010 jyly Shymbulaq syrǵanaý maýsymynyń uzaqtyǵy men jyldyq ortasha qary (9 metr) jáne áýejaıdan kýrortqa deıingi jol ýaqyty boıynsha (40 mınýt) 1-shi, bazalyq bıiktik ólshemi boıynsha (3-shi, bıiktiktiń joǵary ólshemi boıynsha) 5-shi, trassasynyń uzyndyǵy (30 km) jáne trassadan ótkizý múmkindigi jaǵynan (6 myń adam) 11-shi oryn alady.
Taý shańǵysy týrızmi búgingi tańda Almaty qalasyndaǵy týrızmniń basym 4 baǵytynyń biri bolyp otyr. Jalpy taý shańǵysy týrızminde týrıster kúnine orta eseppen 250 dollar jumsaıdy eken. Bul kórsetkish jaǵajaı týrızminde 50 dollar ǵana. Taý shańǵysy týrızmi kirisiniń úlesi jalpy ishki ónimde aldyńǵy jyly Avstrııada 8 paıyz, Shveıtsarııada 7 paıyzǵa jýyq, Frantsııa men Kanadada 2 paıyzǵa jýyq, Italııada 1 paıyzdy qurady.
