Taý shańǵysy bazalaryn salýdy qolǵa alatyn azamattarǵa jeke qoldaý jasaıtyn bolamyn - T. Dosmuhambetov
ASTANA 21 aqpan. QazAqparat /Arman Asqarov/ - Elimizde tań shańǵysy bazalaryn salýǵa nıet bildiretin azamattarǵa jan-jaqty qoldaý kórsetiletin bolady.
Búgin QR Týrızm jáne sport mınıstrliginiń keńeıtilgen alqa májilisinde mınıstr Temirhan Dosmuhambetov osylaı aıtty.
«Bizdegi taý shańǵysy sportyn damytýǵa qajetti taýlar eshkimde joq. Oǵan qosa bizde Almaty sııaqty taý shańǵysy bazasyna óte jaqyn qala bar. Eýropada bolsa qys mezgili bizdikinen 2-3 aıǵa qysqa. Sondyqtan Qazaqstanda taý shańǵysy bazalaryn keńinen damytý qajet. Ony Elbasy da atap ótip, taý shańǵysy bazalaryn salatyn kásipkerlerdi salyqtan bosatýdy tapsyrǵan bolatyn. Eger osy taý shańǵysy bazasymen aınalysatyn naqty azamattar tabylsa, men olarǵa jan-jaqty qoldaý kórsetýge ázirmin. Salyqtan bosatyp, qurylys jumystaryn jeńildetýge daıarmyn. Onyń ishinde jańa qural-jabdyqtardy jetkizý, sondaı-aq ozyq tehnologııalardy ornatý jumystaryna qoldaý kórsetiledi. Búginde biz Býrabaı kýrorty aımaǵyn ıgerýdemiz. Osyǵan baılanysty oblys basshylyǵy bul jerdegi taý shańǵysy trassasyn salýdy bastaýy tıis»,-dedi T. Dosmuhambetov.
Mınıstr atap kórsetkendeı, 7- qysqy Azııa oıyndarynan keıin Qazaqstannyń taý shańǵysy bazalaryna degen suranys kúrt ósti. «Bul bizdiń osy saladaǵy joǵary áleýetimizdi kórsetedi. Demek, osy másele boıynsha naqty jumys isteý qajet»,-dedi ol.
