Taý kólderiniń tasýy problemasynda óńirlerdiń kúsh-jigerin biriktirý kerek - BUU
ASTANA. KAZINFORM — Taý kólderiniń tasýy problemasyn sheshýde Ortalyq Azııa men Gımalaıda, Alpide jınaqtalǵan tájirıbeni tolyq zerttep, tabıǵı apatqa qarsy is-qımyldardy pysyqtaý kerek. Bul týraly elordadaǵy Óńirlik ekologııalyq sammıtte BUU-nyń Apattar táýekelin azaıtý basqarmasynyń basshysy Kamal Kıshor málim etti.
- Taýdaǵy kólderdiń tasýy saldaryn tómendetý úshin erterek dabyl berý júıesin jetildirýdi qajet etedi. Qazirgi kezde muzdyq kólderiniń az ǵana biligi baqylaýǵa alynǵan. Bul jaǵdaı dabyl júıesindegi kemshilikterdi anyq baıqatty, - dedi K. Kıshor.
Onyń paıymynsha, taýly aımaqtardaǵy turǵyndardyń tájirıbesi men bilimin keńinen paıdalaný kerek.
- Máselen, bir ǵana kóldiń tasýy shamaly ýaqyttyń ishinde taýdyń etegindegi orasan zor ınfraqurylymdy shaıyp ketýi múmkin. Bul problemany aldyn alýǵa erekshe mán berip, bárin aldyn ala josparlaý qajet. Atap aıtqanda, Ortalyq Azııada júzege asyp jatqan jumystar kóńil kónshitedi. Shyn máninde, biraz is atqarylǵan. Biraq basqa óńirler de osy problemalardy sezinip otyr. Osy problemalar Gımalaıda, Nepalda, Pákistanda jáne Býtanda da bar.
Sondyqtan bul damýshy elder úshin ǵana problema emes, sonymen qatar damyǵan elder de qaýipke tótep bere almaı jatady. Jalpy, Ortalyq Azııada, Gımalaıda, Alpide júzege asyp jatqan jumystar jaıynda habardarmyz. Bul rette jınaqtalǵan tájirıbe men bilimdi almasý mańyzdy, - dedi BUU-nyń Apattar táýekelin azaıtý basqarmasynyń basshysy.
Aıta keteıik, sammıt barysynda Ortalyq Azııadaǵy muzdyqtar jyldam erip jatqany aıtyldy.
