«Taý-Ken Samuryqqa» jer qoınaýyn paıdalaný boıynsha basym quqyq berilmek
ASTANA. KAZINFORM — «Taý-Ken Samuryqqa» jer qoınaýyn paıdalaný boıynsha basym quqyq berilmek. Bul týraly Úkimet otyrysynda Ónerkásip jáne qurylys vıtse-mınıstri Iran Sharhan aıtty.
— Geologııalyq taldaý sapasyn arttyrý maqsatynda «Ulttyq geologııalyq qyzmet» bazasynda jańa zamanaýı zerthana kesheni qurylyp, ǵylymı-tehnologııalyq ortalyq retinde qyzmet atqaratyn bolady. Jobada zerthanadan bólek qor saqtaý jáne kernoqoıma ǵımarattary da qarastyrylǵan. Bul elimizde biryńǵaı geologııalyq derekter bazasyn qalyptastyrýǵa múmkindik beredi. Qurylys jumystaryna Astana qalasynan 4 gektar jer ýchaskesi bólindi. Joba quny — 14 mıllıard teńge. Zerthanalyq keshendi 2028 jylǵy jeltoqsanda iske qosý josparlanǵan, — dedi vıtse-mınıstr.
Onyń aıtýynsha, júrgizilip jatqan reformalar salanyń ashyqtyǵyn arttyryp, ınvestıtsııa kóleminiń jyl saıyn ósýine yqpal etip otyr.
— Qazirde iri ınvestıtsııalar geologııalyq barlaýda tájirıbesi mol «Taý-Ken Samuryq» kompanııasy arqyly tartylyp jatyr. Kompanııa Fortescue, Esan sııaqty iri halyqaralyq seriktesterdi tartyp, 21 birlesken kásiporyn qurdy. 72 mıllıard teńgeden astam ınvestıtsııa salyndy jáne 8 ken orny zerttelip, memlekettik balansqa alyndy. Qazirgi ýaqytta bes pılottyq joba — Josabaı, Quıryqtykól, Qaratas, Nura-Taldy, Soltústik Qatpar jáne Joǵarǵy Qaıraqty ýchaskelerinde jumys júrgizilýde. 2028 jyly bul jobalar boıynsha qorlardy JORC standartyna saı esepke qoıý josparlanǵan. Osyǵan oraı memleket múddesin qorǵaý úshin «Taý-Ken Samuryqqa» jer qoınaýyn paıdalaný boıynsha basym quqyq berý qarastyrylýda, — dedi Iran Sharhan.
Aıta keteıik, Úkimet otyrysynda Premer-mınıstr Oljas Bektenov
Bektenov Geologııalyq klaster quramynda zamanaýı zerthana qurylysyn 2026 jyly bastaýdy tapsyrdy.