Taý-ken salasyn paıdalanýshylarǵa jeńildikter ornyna qosymsha kenishterdi ıgerý múmkindigi berilmek

NUR-SULTAN. QazAqparat – Taý-ken salasynda jer qoınaýyn ıgerýshilerge jeńildikter ornyna qosymsha kenishterdi ıgerý múmkindigi berilmek. Bul týraly QR Indýstrııa jáne ınfraqurylymdyq damý mınıstri Qaıyrbek Óskenbaev Úkimet otyrysynda málim etti, dep habarlady QazAqparat tilshisi.

«Taý-ken metallýrgııa kesheni úshin qosymsha júkteme jáne jeńildikter boıynsha jyl saıyn memleket bıýdjetin tolyqtyratyn ózge de aýdarymdar qalyptastyrylmaq. 2021 jyldyń qorytyndysy boıynsha 300 mlrd teńge mólsherinde soma anyqtaldy.

Jeńildikter túrindegi erikti aýdarymdardyń ornyna metaldardy odan ári ıgerý jáne shyǵarý úshin ken oryndary beriletin bolady», - dedi vedomstvo basshysy.

Al joǵary qaıta óńdelgen ónimderdi shyǵaratyn kásiporyndar jańa jobalar úshin salyqtyń barlyq túrlerinen bosatylmaq.

«Shetelden ákelinetin alıýmınıı, mys buıymdaryna táýeldilikti azaıtý maqsatynda «Ónerkásiptik saıasat týraly» zańda óńdeý ónerkásibiniń otandyq kásiporyndaryn shıkizatpen qamtamasyz etý qaǵıdalaryn ázirleý jáne bekitý jónindegi Mınıstrliktiń quzyreti kózdelgen, bul kásiporyndardy daıyn buıymdar shyǵarýǵa yntalandyrýǵa yqpal etedi», -dedi mınıstr.