Taý-ken ornynda júk kóligin tizgindegen áıelder
Aqmola oblysyndaǵy taýly eldi mekenderiniń turǵyndary taý-ken salasynda tabysty eńbek etip júr. Stepnogorsk qalasynan kópbalaly ana Aıgúl Jumataeva, Zavodskoı aýylynyń turǵyny Olga Ganske, balalardy ózi tárbıelep otyrǵan jalǵyzbasty analar Ekaterına Bondarenko men Magıra Nebýsova, Bógenbaı aýylynan kólik júrgizýshisi Anastasııa Terhoeva traktorshydan aýyr júk kóliginiń júrgizýshisine deıingi qyzmet túrlerin abyroımen atqaryp keledi.
Bala tárbıesi men júk kóliginiń júrgizýshisi mamandyǵyn qatar alyp júrýge bolady. Muny stepnogorlyq Aıgúl Jumataeva dáleldep otyr. Aıgúl aspazshy, tehnologııa mamandyǵy boıynsha bilim alǵan, biraq bul baǵytta jumys istemegen. Aýyr kólikterdi júrgizý daǵdylaryn meńgergenge deıin ol jergilikti zaýytta suryptaýshy bolǵan. Jumys berýshiniń esebinen oqý jáne jumysqa ornalasý múmkindikteri týraly bilip, ol osy jumysty isteýge ótinish bergen. Búginde traktorshy mamandyǵyn oqydy, al mamyr aıynda 35 tonnalyq júk kólikterin júrgizýge múmkindik beretin «S» sanatyn alady.
«Meniń kúıeýim de júrgizýshi, ol maǵan kólik júrgizýdi úıretti. Bastapqyda meniń aýyr júk kóliginiń júrgizýshisi bolatynyma kúmándana qarady. Qazir,kúıeýim de, balalarym da meni qoldaıdy. Kóńilińiz shyn qalasa, balany da tárbıelep, ózińizge unaıtyn isti de qatar alyp júrýge bolady», - deıdi ol.
Anastasııa Terhoeva da aýyr júk kóligin júrgizýdi bala kúninen armandaǵanyn aıtady.
«Bala kúnimnen kólikti jaqsy kóremin. 12 jasymnan bastap rólge otyrdym. Tańdaýyma eshkim tańǵalǵan joq. Traktor – meniń súıikti kóligim. Únemi áıelderge er adamdardyń kásibin meńgerýden qoryqpańdar dep aıtyp júrmin. Búginde jeti jasar ulym barshaǵa anasynyń samosval júrgizýshisi ekenin maqtanyshpen aıtady», - deıdi Anastasııa.
Búginde ol 40 tonnalyq júk kóligi men shahtanyń óndiristik joldaryndaǵy shańdy basatyn sý sepkishti basqarady. Anastasııa kólikti seziný kerek dep esepteıdi.
«Bastapqyda samosvaldyń taıǵaq jolda ózin qalaı ustaıtynyn bilmedim. Munda ólshemderdi barlaý mańyzdy, biz bul úshin únemi jattyǵýlardan ótemiz. Árkimniń óz júrgizý stıli bar. Negizi samosval óte yńǵaıly basqarylatyn kólik. Aıtpaqshy, karerdegi jol tóseminiń ózindik erekshelikteri bar, óte muqııat bolý kerek. Sol jolmen kele jatqanda kúrt tejeý kezinde abaı bolǵan jón», - deıdi ol.
Kelesi keıipkerimiz Olga Ganske buryn qoımashy bolyp jumys istegen. Aýyr júk kólikteriniń júrgizýshi áıelderine arnalǵan jarnamany kórip, beıtanys mamandyqty ıgerýge bel býypty. Úlken CAT samosvalyna alǵash otyrǵanda qatty qobaljyǵanyn aıtady. Biraq Olga bul kásipti ıgerýge tabandy túrde bel býyp, júrgizýshi kabınasynda ózin qaýipsiz ári jaıly sezingen.
«Tehnıkamen dos bolyp kettim. Eń bastysy, qaýipsizdik erejelerin saqtaý jáne kóliktiń ólshemderin seziný kerek. Áıel aýyr tehnıkany qaýipsiz júrgizýde jáne saýatty paıdalanýda erlerden kem túspeıdi», - dedi Olga.
Olardyń joǵary bilimi bolmasa da, jumys isteýge, súıikti isimen aınalysýǵa degen qulshynysy zor bolǵan. Qyzdar altyn óndirýshi «Altynalmas» kásipornyndaǵy bos jumys oryndaryna ótinish bergen. Kásiporyn olardy jumysqa alyp qana qoımaı, oqý jáne taǵylymdamadan ótkizý mindetterin de moınyna aldy. Kompanııa áıelderge buryn dástúrli erler kásibi sanalatyn jańa kásipti ıgerýge múmkindik beretin «Women in Mining» baǵdarlamasyn júzege asyrýda. Jobanyń alǵashqy qarlyǵashtary názikjandy áıelderdiń kóp nársege qabiletti ekenin kórsetti. Olar úshin búginde eshqandaı kedergi joq.
