Taý-ken metallýrgııa kesheniniń Jańa mamandyqtar atlasy jańartyldy

ASTANA. KAZINFORM - Búgin Astanada Memleket basshysynyń bastamasymen uıymdastyrylǵan Jumysshy mamandyqtary jyly qorytyndylaryn shyǵarý rásiminde Taý-ken metallýrgııa kesheniniń (TMK) Jańa mamandyqtar men quzyrettilik atlasynyń jańartý jumystarynyń aıaqtalǵany jarııalandy, dep habarlaıdy QR Ǵylym jáne joǵary bilim mınıstrlininiń baspasóz qyzmeti.

Saltanatty sharanyń negizgi oqıǵasy – «Eńbek joly» respýblıkalyq baıqaýynyń jeńimpazdaryn marapattaý rásimi boldy. Oǵan QR Memlekettik keńesshisi Erlan Qarın jáne QR Premer-Mınıstrdiń orynbasary - mádenıet jáne aqparat mınıstri Aıda Balaeva qatysty. 

Baıqaý jeńimpazdary jańartylǵan Jańa mamandyqtar Atlasynda kórsetilgen kásibı traektorııalar men eńbek qundylyqtarynyń naqty dáleli boldy.
Shara barysynda QR Ǵylym jáne joǵary bilim mınıstri Saıasat Nurbekke Taý-ken óndirýshi jáne taý-ken metallýrgııalyq kásiporyndardyń respýblıkalyq qaýymdastyǵy (TMKQ) resmı ókili Bahyt Manasbaeva jańartylǵan TMK mamandyqtar atlasyn resmı túrde tabys etti.

Jańa mamandyqtar atlasyn jańartý Jumysshy mamandyqtary jyly aıasyndaǵy negizgi nátıjelerdiń biri jáne júıeli kadrlyq saıasatty qalyptastyrýda mańyzdy qadam bolyp sanalady. Jańartylǵan atlas eńbek naryǵyndaǵy qurylymdyq ózgeristerdi, tsıfrlandyrý men avtomattandyrýdyń, sondaı-aq ESG kún tártibiniń áserin kórsetedi, sonymen qatar bolashaqta suranysqa ıe mamandyqtar men quzyretterdi uzaq merzimdi boljamdaýǵa múmkindik beredi.

Qazaqstan ekonomıkasynyń bazalyq salasy – taý-ken metallýrgııa kesheni úshin Atlastyń mańyzy erekshe. Jańartý barysynda TMKQ alańynda óndiristik protsesterdi tsıfrlyq basqarý, ónerkásiptik qaýipsizdik, ekologııalyq baqylaý jáne derekterdi analıtıkamen baılanysty jańa jáne transformatsııalanatyn mamandyqtar anyqtaldy. Olardyń qatarynda jasandy ıntellektini baqylaý operatory, jabdyqtardy tsıfrlyq jobalaý ınjeneri, eko-analıtık, prompt-ınjener, robot basqaratyn kólik qaýipsizdigi boıynsha maman bar. Ǵylymdar toǵysynda jańa mamandyqtar qalyptasyp jatyr: baıytýshy fızık-hımık, ınjener-skanerleýshi, qashyqtan basqaratyn geoanalıtık.

Memleket basshysy Qasym-Jomart Toqaevtyń Joldaýlarynda «jasyl ekonomıkaǵa» ótý, ESG prıntsıpterin damytý jáne eńbek ónimdiligin arttyrý qajettiligi birneshe ret aıtylǵan. Atlas 2.0-di ázirleý aıasynda júrgizilgen forsaıt nátıjeleri ónerkásip sektoryndaǵy basymdyqtar ulttyq maqsattarmen kóp jaǵdaıda sáıkes keletinin kórsetti. Atap aıtqanda, eko- analıtık, prompt-ınjener, eńbek qaýipsizdiginiń tsıfrlyq analıtıgi sııaqty mamandyqtardyń paıda bolýy boljandy.

TMK Jańa mamandyqtar atlasyn iske asyrý iri salalyq seriktesterdiń qoldaýymen múmkin boldy. Atlastyń óńirler úshin mańyzy zor, ásirese qala qurylymyn qalyptastyratyn monoqalalar úshin. Onyń engizilýi jastar úshin zamanaýı jáne suranysqa ıe kásibı traektorııalardy qalyptastyrýǵa yqpal etedi.
Atlas 2.0 – 5-10 jyldyq perspektıvadaǵy kadrlyq qajettilikti kórsetetin strategııalyq josparlaý quraly jáne bilim berý men ınvestıtsııalyq baǵdarlamalardy damytýǵa negiz bolyp qyzmet etedi. Jańartylǵan atlas Jumysshy mamandyqtary jyly qorytyndylaryn shyǵaryp, eldiń bilim berý júıesi, eńbek naryǵy jáne ónerkásiptik áleýetin ári qaraı damytýǵa negiz qalaıdy.

Osyǵan deıin Premer-mınıstrdiń orynbasary — Mádenıet jáne aqparat mınıstri Aıda Balaeva elordada ótken qorytyndy jıynda jumysshy mamandardy qoldaý jalǵasy beretini týraly aıtqan edi.