Taý-ken metallýrgııa kesheni sýbektilerine QQS-ty avtomatty qaıtarý shegi 80 paıyzǵa ulǵaıady

NUR-SULTAN. QazAqparat - Taý-ken metallýrgııa kesheni sýbektilerine qosylǵan qun salyǵyn avtomatty qaıtarý shegi 80 paıyzǵa deıin ulǵaıtylady. Bul týraly búgin Úkimet otyrysynda el ekonomıkasyn qalpyna keltirý jónindegi keshendi jospardy tanystyrǵan QR Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

Mınıstrdiń aıtýynsha, taý-ken metallýrgııa keshenin qoldaý sharalary aıasynda qosylǵan qun salyǵyn avtomatty qaıtarý shegi 80 paıyzǵa deıin ulǵaıtylady. Bul jyl sońyna deıingi kezeńde 2020 jylǵy 1-3 toqsan aralyǵyndaǵy salyqty óteýdi jedeldetedi. Avanstyq korporatıvtik tabys salyǵynyń bir bóligin kelesi jyldyń 10 sáýirine aýystyrý josparlanyp otyr.

«Rentabeldigi tómen ken oryndary úshin paıdaly qazbalardy óndirý salyǵyn tómendetilgen mólshermen berý jedel qaralady. Sondaı-aq, «kedendik aýmaqta qaıta óńdeý» rejımi úshin kedendik baqylaý rásimi jeńildetiledi», - dedi Rýslan Dálenov.

Sonymen qatar ol qujat kóshirmelerin rastaýshy qujat retinde paıdalanýǵa ýaqytsha ruqsat berý josparlanyp otyrǵanyn aıtty.

Foto: old.proektoria.online