Taý-ken kesheni: 3,5 trln teńgege 5 ınvestıtsııalyq joba iske qosylady
ASTANA. KAZINFORM — Ótken jyly taý-ken kesheni salasyna quıylǵan ınvestıtsııa kólemi 12%-ǵa ósip, 3,6 mlrd AQSh dollaryna jetti.
Salanyń damýy týraly tolyǵyraq Ónerkásip jáne qurylys vıtse-mınıstri Iran Sharhan aıtyp berdi.
— Búgin biz jahandyq shıkizat naryǵyndaǵy qarqyndy ózgerister jaǵdaıynda jınalyp otyrmyz. Suranys pen naqty óndirý kólemi arasyndaǵy alshaqtyq baıqalyp otyr. Kendegi metall úlesi azaıyp, negizgi komponentterge qol jetkizý barǵan saıyn saıasılanyp bara jatyr. Bizdiń elimiz úshin taý-ken metallýrgııa kesheni ekonomıkalyq ósýdiń tiregine aınalyp, el ekonomıkasyna qomaqty úles qosyp otyr. Bul jumys oryndaryn ashýǵa, óńirlerdi damytýǵa, ınvestıtsııa tartýǵa jáne ekonomıkany ártaraptandyrýǵa yqpal etedi, — dedi Iran Sharhan elordada ótip jatqan 15-i halyqaralyq taý-ken metallýrgııa kongresinde.
Mınıstr orynbasary keltirgen statıstıkaǵa súıensek, 2024 jyly taý-ken kesheniniń JІÓ-degi (jalpy ishki ónim) úlesi 8%-dy qurap, óndirilgen ónim kólemi 14,3 trln teńgeden asty.
— Investıtsııa kólemi 12%-ǵa ósip, 3,6 mlrd AQSh dollaryna jetti. Ónim eksporty 21,4 mlrd AQSh dollaryn qurady. Jaqyn arada jalpy quny 3,5 trln teńgeden asatyn 5 iri ınvestıtsııalyq jobany iske asyrý josparlanyp otyr. Bul shamamen 8 myń jumys ornyn qurýǵa múmkindik beredi. Bul kórsetkishter salanyń joǵary damý deńgeıin jáne onyń álemdik ekonomıkamen tyǵyz yqpaldasqanyn kórsetip otyr, — deıdi vıtse-mınıstr.
Aıta keteıik, elordada halyqaralyq taý-ken metallýrgııa kongresi ótip jatyr. Oǵan álemniń 20 elinen 1300 delegat qatysyp jatyr.