«Taý Ken Altyn» Ulttyq bankke 10 tonna altyn quımasyn satty
ASTANA. QazAqparat - 2018 jyldyń alǵashqy jartyjyldyǵynda «Taý Ken Altyn» affınaj zaýyty 10 tonnadan astam altyn shyǵardy, dep habarlaıdy QazAqparat.
«Ulttyq bankke 10 tonnadan astam qospalardan aıyrylǵan 9999 sapaly taza metall ótkizdik. Ondaǵy ár quımanyń salmaǵy 12 kelini quraıdy», - dedi zaýyt ókili Muratbek Janas Qazaqstan brendteri týraly kitap tanystyrylymynda.
Onyń aıtýynsha, zaýyt respýblıka lombardtary ótkizgen metall synyqtaryn da óńdeýden ótkizedi.
Jyl sońyna deıin «Taý-Ken Altyn» 20 tonna altyn quımalaryn affınajdap, Ulttyq bankke ótkizýdi josparlap otyr.
Odan bólek, kásiporyn zergerlermen ýaǵdalasyp, olarǵa London bırjasy bekitken baǵa boıynsha altyn satýdy josparlap otyr.
«Zergerlerge daıyn qorytpalardy satý arqyly kómekteskimiz keledi. Sebebi, zergerler bir mezgilde bir keliden asatyn altyndy satyp ala almaıdy, olarǵa 100 grammnan bastap, túıirshik túrinde sata alamyz. Ulttyq banktiń bizge qoıǵan shekteýi bar, ıaǵnı alǵashqy jartyjyldyqta 150 kelige deıin ǵana metall sata alamyz», - dedi Muratbek Janas.
Aıta keteıik, «Taý-Ken Altyn» 2013 jyly iske qosyldy jáne 2014 jyldan beri QR Ulttyq bankine altyn quımalardy ótkizip keledi.
