Tatýırovka men pırsıng jasatqan adam nege qan donory bola almaıdy
ASTANA. KAZINFORM — Qazaqstanda qan donory bolǵysy keletin árbir azamat medıtsınalyq tekserýden ótedi. Sonyń nátıjesine qaraı keıbir azamattarǵa qan tapsyrýǵa birjola tyıym salynsa, endi birine belgili bir ýaqyt ótkennen keıin ǵana donor bolýǵa ruqsat beriledi. Bul týraly Transfýzıologııa ǵylymı-óndiristik ortalyǵy Kazinform agenttiginiń resmı saýalyna bergen jaýabynda málim etti.
Ortalyqtyń málimetinshe, donorlyqqa qarsy kórsetilimder eki topqa bólinedi: absolıýtti jáne ýaqytsha.
— Absolıýtti qarsy kórsetilimderge AITV ınfektsııasy, V jáne S vırýsty gepatıtteri, merez, týberkýlezdiń belsendi túri, qaterli isikter, qan júıesiniń aýrýlary, aýyr júrek-qan tamyrlary aýrýlary jáne basqa da sozylmaly aýrýlar jatady, — dedi ortalyǵy Qoǵammen baılanys jáne yntymaqtastyq bóliminiń basshysy Alma Demeýova.
Al keıbir jaǵdaıda azamattar birden donor bola almaıdy. Dárigerler mundaı adamdarǵa densaýlyǵy qalpyna kelgenshe nemese belgilengen merzim aıaqtalǵansha qan tapsyrýdy keıinge qaldyrýdy usynady.
— Máselen, adam jedel respıratorlyq ınfektsııamen aýyrsa, antıbıotık qabyldap júrse, jaqynda vaktsına saldyrsa, ota jasatsa, júkti bolsa, bosanǵannan keıin qalpyna kelý kezeńinde júrse nemese tatýırovka, pırsıng jasatqan bolsa, ýaqytsha qan donory bola almaıdy, — dedi bólim basshysy.
Mamannyń aıtýynsha, bul talaptar donordyń densaýlyǵyn ǵana emes, qan quıylatyn naýqastyń qaýipsizdigin de qamtamasyz etýge baǵyttalyp otyr.
Aıta keteıik, Qazaqstanda sońǵy on jylda 140 myńnan astam turaqty qan donory tirkeldi.
