«Tatý otbasy» baıqaýynda úzdik atanǵan búldirshin 1 jastan endi asty
ALMATY. QazAqparat – «Tatý otbasy» respýblıkalyq baıqaýynyń jeńimpazy, eń úzdik fotodaǵy baldyrǵan - 1 jastan endi asqan Ámirhan Ádiletuly qazir Shymkent qalasynda turyp jatyr.
Byltyr qazanda ótken respblıkalyq baıqaýda qazylar alqasy Ámirhannyń fotosýretterin úzdik dep tapqan.
Baıqaýda jeńimpaz atanǵanda ol nebári 6 aılyq bolatyn. Qazir Ámirhan 1 jas 3 aı tolyp, aqyryndap táı-táılap qadam basyp, eki sózdiń basyn qurap júr.
Halyqaralyq Otbasy kúnine oraı búgin jas otbasynan suhbat aldyq. Ádilet Rymqanov pen Aıdana osydan úsh jyl buryn otaý qurǵan. Ekeýi de - ShQO Aıagóz aýdany Mamyrsý aýylynyń týmasy.
«Sol jerde mektep bitirip, Almatyǵa oqýǵa tústik. Bakalavrdy da, magıstratýrany da Almatyda oqyp, eńbek jolyn Almatyda bastadyq. Negizinde Almatyda turamyz. El tynyshtyǵyna qaýip tóngen ýaqytta joldasym qyzmet babymen Shymkent qalasyna aýysty», - deıdi Aıdana Rymqanova.
Otaǵasy Rymqanov Ádilet Shymkent qalasyndaǵy 35748 áskerı bólimniń tárbıe jáne ıdeologııalyq jumystar jónindegi rota komandıriniń orynbasary bolyp qyzmet etedi. Sheni – aǵa leıtenant.
Aıdana Rymqanova ulynyń atynan Instagram paraqsha ashqanda balalyq shaǵynan ádemi estelik qaldyrýdy ǵana oılaǵan.
«Ulymnyń paraqshasyn dúnıege kelgen sátinen bastap jaqsy estelikter qaldyrý úshin ashtym. Óskende balalyq shaǵy qandaı baqytty bolǵanyn tamashalasyn, otbasylyq meıirim men mahabbatty sezinip óssin degen oımen ashqan edim. Sosyn QR Aqparat jane qoǵamdyq damý mınıstrligi, CISC azamattyq bastamalardy qoldaý ortalyǵy, respýblıkalyq «Jas ulan» uıymy bastaǵan baıqaýǵa qatysýdy uıǵardyq. Bul - Jastar jylyna qatysty Elbasy tapsyrmasy boıynsha qolǵa alynǵan joba bolatyn. Baıqaýǵa úsheýimizdiń sýretimizdi, astyna 60-90 sózben esse jazyp jiberdik. Sol baıqaýda ulymnyń sýreti foto atalymynda úzdik dep tanyldy. Marapattaý Nur-Sultan qalasynda boldy. Qazaqstandaǵy eń úlgili otbasy sanalatyn ánshi Dımash Qudaıbergenniń ákesi Qanat Aıtbaevtyń qolynan marapat aldyq», - deıdi Aıdana Rymqanova.
Onyń aıtýynsha, áskerı qyzmetshi bolýdan áskerı qyzmetshiniń jary bolý qıyn.
«Menińshe otbasy qundylyqtary degenimiz qazynaly qarttarymyzdyń bergen tárbıesin jas urpaqtyń boıyna sińire bilý, olardy jastaıynan eńbeksúıgishtikke, adal bolýǵa, jaqsy men jamandy ajyrata bilýge, adamgershilikke tárbeleý. Osy maqsatta ata-ana aıanbaı eńbek etýi tıis. Balaǵa kóńil bólip, qajettilikterimen tolyq qamtamasyz etip, onymen qosa kosa meıirim men mahabbat syılaýy kerek. Osy jolda ata-ananyń bir-birine degen syılastyǵy, túsinistigi, qoldaýy kóp ról oınaıdy. Áskerı ómir ońaı emes. Endi bir jerge úırenip jatqanda basqa jerge kóship, tanys izdep otyrý qıyn. Balamyz áli kishkentaı bolǵandyqtan qazir onsha bilinbeýi múmkin. Ósken soń mektepte qıyndyq bolady dep oılaımyn. Biraq, barlyq qıyndyqtarǵa tótep berýge týra keledi», - dedi Aıdana Rymqanova.
