Tatarstannyń jańa prezıdenti búgin qyzmetine kirisedi
ASTANA. Naýryzdyń 25-i. QazAqparat - Rýstam Mınnıhanov búgin, naýryzdyń 25-i kúni Tatarstan Respýblıkasynyń Prezıdenti laýazymyna kirisedi. «Respýblıka Memlekettik keńesiniń saltanatty sessııasy ádettegideı jergilikti Parlamenttiń ǵımaratynda emes, Salıh Baıdashev atyndaǵy Úlken kontsert zalynda ótedi»,
- dep habarlady ITAR-TASS agenttigine Memlekettik keńestiń tóraǵasy Farıd Mýhametshın. Onda jańa prezıdent eki tilde: orys jáne tatar tilderinde ant qabyldaıdy.
Spıkerdiń aıtýynsha, saltanatty sharaǵa qatysý úshin Qazanǵa qadirli qonaqtar keldi, olardyń qatarynda Islam Konferentsııasy Uıymynyń bas hatshysy Ekmeleddın Yqsanoǵly, Qazaqstan, Túrikmenstan, Polsha delegatsııalary bar.
RF Prezıdenti Dmıtrıı Medvedev Tatarstan prezıdentiniń laýazymyna Mınnıhanovtyń kandıdatýrasyn respýblıkanyń Memlekettik keńesiniń qaraýyna qańtardyń 27-sinde engizgen bolatyn. Sol kezdegi respýblıka basshysy Mıntemir Shaımıev qańtardyń 22-sinde RF Prezıdentimen bolǵan kezdesýde, naýryzdyń 25-inde aıaqtalatyn onyń ókilettigin uzartý máselesin qarastyrmaý týraly ótinish jasaǵan bolatyn. Mınnıhanov naýryzdyń 4-inde Tatarstan prezıdentiniń ókilettigine ıe boldy, depýtattar onyń kandıdatýrasy úshin biraýyzdan daýys berdi.
