Tatarstannyń tuńǵysh Prezıdenti «Uly dala» forýmyna quttyqtaý joldady
ASTANA. QazAqparat - Tatarstannyń tuńǵysh Prezıdenti Mıntemır Shaımıev «Uly dala» túrki halyqtarynyń forýmyna tatar tilinde quttyqtaý joldady.
«Uly dala» ІІ gýmanıtarlyq ǵylymdar forýmynyń uıymdastyrýshylary men qatysýshylaryn shyn júrekten quttyqtaımyn! Astanada joǵary deńgeıde uıymdastyrylǵan forým Eýrazııalyq memleketterdiń ǵylymı, aǵartýshylyq, mádenı ómiriniń úlken oqıǵasy ekeni daýsyz. Bul óz kezeginde ózara syılastyq úshin, bilim, rýhanı jáne materıaldyq qundylyqtarmen almasýda asa mańyzdy. Halyqaralyq forým jumysy Eýrazııa úshin ortaq bolyp tabylatyn mádenı qundylyqtardy nasıhattaýda óz úlesin qosady degen senimdemin. Forým qatysýshylaryna jemisti jumys pen shyǵarmashylyq jetistikter tileımin», - delingen M. Shaımıevtiń quttyqtaýynda.
Aıta keteıik, búgin, 26 mamyrda Astanada Halyqaralyq Túrki akademııasy (TWESCO) uıymdastyrǵan «Uly dala» ІІ gýmanıtarlyq ǵylymdar forýmy ótken bolatyn. Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasyna arnalǵan forýmnyń ashylý saltanatyna Qazaqstan Respýblıkasynyń Memlekettik hatshysy Gúlshara Ábdiqalyqova men BUU, ıÝNESKO, ISESKO, ECO Science Foundation, Túrki keńesi, TÚRKSOI, TúrkPA syndy halyqaralyq uıym basshylary men ókilderi qatysty. AQSh, Vengrııa, Germanııa, Qytaı, Mońǵolııa, Ońtústik Koreıa, Úndistan, Reseı men túrki memleketterinen kelgen 200-ge jýyq ǵalym-zertteýshiler men sarapshylar 6 paneldi otyrysta mazmundy baıandamalar jasap, Elbasy maqalasynda kóterilgen mindetter men taqyryptar tóńireginde paıymdy pikirlerin ortaǵa saldy.
Forým aıasynda «Rýhanı jańǵyrý jolynda», «Ǵylym kıesi: ǵylymı ıntegratsııa jáne ortaq qundylyqtar», «Tarıhı jady jáne bolashaqqa kózqaras», «Túrki ádebı dástúri jáne qazirgi kezeń», «Túrki tilderi: zertteý, qorǵaý jáne dáripteý», «Álem órkenıetindegi Túrki mádenı murasy» atty alty sektsııada ǵylymdy damytý máseleleri, qazaq tiliniń latyn álipbıine kóshýi, kıeli jerler men qasterli mekenderge arnalǵan «Týǵan jer» baǵdarlamasy syndy máseleler talqylanyp, syndarly pikirler aıtyldy.
Bunyń aldynda habarlaǵanymyzdaı, QR Prezıdenti Nursultan Nazarbaev «Uly dala» xalyqaralyq forýmyna sáttilik tiledi.
