Tatarstannyń Musylmandar dinı basqarmasy apparatynyń basshylaryna jasalǵan qastandyq olardyń kásibı qyzmetterine baılanysty bolýy múmkin
MÁSKEÝ. 19 shilde. QazAqparat - Búgin Qazanda Musylmandar dinı basqarmasy apparatynyń basshylaryna qastandyq jasaldy.
Esterińizge sala keteıik, búgin shamamen saǵat 10.00-de Tatarstannyń múftıi Ildýs Faızov otyrǵan kólik jaryldy. Jaraqat alǵan múftı jedel járdem kóligine óz kúshimen keldi. Al shamamen osy ýaqytta múftıdiń orynbasary Valıýlla ıAkýpovty bireýler úıiniń aldynda atyp ketti.
Buǵan deıin habarlaǵanymyzdaı, múftıdiń kóligi Mýsın jáne Chetaev kósheleri qıylysynda jaryldy.
Eki fakti boıynsha RF tekserý komıtetimen qylmystyq ister qozǵaldy. Aıta keteıik, jasalǵan qastandyq olardyń kásibı qyzmetterine baılanysty bolýy múmkin degen boljam bar.
Reseılik buqaralyq aqparat quraldarynan habarlanǵandaı, sońǵy ýaqytta Tatarstannyń jekelegen dinı toptary qajylyqty uıymdastyrýǵa shaǵymdanǵan, olardyń pikirlerinshe, múftı basshylyǵy qajylardan iri kólemde zańsyz aqsha alyp turǵan. Sonymen qatar, dinı qaıratkerler belsendi túrde radıkaldy ıslamǵa qarsy shyǵyp turǵan.
