Tatarstannyń 40-qa jýyq aýdanynda tótenshe jaǵdaı engizildi

QAZAN. TASS-QazAqparat – Tatarstan úkimeti aptap ystyqqa baılanysty qaýipti aýa raıy qubylystary rastalǵan óńirdiń 38 mýnıtsıpaldy aýdanynda tótenshe jaǵdaı engizý týraly ókimge qol qoıdy, dep habarlaıdy QazAqparat TASS agenttigine silteme jasap.

Bul týraly Tótenshe jaǵdaıdyń aldyn alý men joıý jáne órt qaýipsizdigin qamtamasyz etý komıssııasynyń otyrysynda respýblıkanyń Aýyl sharýashylyǵy jáne azyq-túlik mınıstrligi Marat Zıabbarov málim etti. Komıssııa otyrysyn Tatarstan prezıdenti Rýstam Mınnıhanov ótkizdi.

Respýblıkada barlyǵy 43 mýnıtsıpaldy aýdan men eki qalalyq okrýg (Qazan jáne Naberejnye Chelny) bar.

«Aptap ystyq pen jańbyrdyń azdyǵy egininiń shyǵýyna jáne ony jınaýǵa qolaısyz jaǵdaı týǵyzyp otyr. Osy máseleni talqylaý kerek jáne ystyq aýa raıynyń jaǵymsyz saldaryn eńserý, respýblıkanyń azyq-túlik jetkiliktiligin saqtaý boıynsha sharalardy qalyptastyrý qajet», - dedi Mınnıhanov otyrysta.

Tatarstannyń Aýyl sharýashylyǵy jáne azyq-túlik mınıstrligi basshysynyń aıtýynsha, 34 mýnıtsıpaldy aýdanda ańyzaq, 18 mýnıtsıpaldy aýdanda topyraq qýańshylyǵy, Mýslıýmov jáne Sarmanov aýdandarynda atmosferalyq qurǵaqshylyq tirkelgen.

Zabbıarov mýnıtsıpaldy deńgeıde TJ rejımin engizý qojalyqtardyń ınvestıtsııalyq jáne qysqa merzimdi nesıelerin óteý, sonymen qatar fors-majorlyq jaǵdaı saldarynyń basqa da mindettemelerin oryndaý ýaqytyn sozdyrýǵa múmkindik beretinin atap ótti. Egistigin saqtandyryp qoıǵan sharýashylyqtar qaýipti qubylystardyń ósimdikterdiń damýyna áser etýin tirkep otyrý úshin ýaqytyly saqtandyrý kompanııasyna jolyǵýy kerek.