Tatarstannnyń Bulǵar qalashyǵynda Reseı aýmaǵynda ıslamnyń taralýyna 1122 jyl tolýyna arnalǵan mereke ótti
ASTANA. 22 mamyr. QazAqparat - Keshe Tatarstan musylmandary Reseı aýmaǵynda ıslam dini alǵashqy qabyldanǵanyna 1122 jyl (hıjra boıynsha) tolýyn atap ótti, dep habarlady ITAR-TASS.
Edildiń sol jaǵalaýynda, Qazannan 120 shaqyrym jerde Edil bulǵarlarynyń burynǵy astanasy - ejelgi Bulǵar qalasyna bir myńǵa jýyq adam jınaldy. Saltanatqa Tatarstan prezıdenti Rýstam Mınnıhanov, Tatarstannyń eks-prezıdenti jáne memlekettik keńesshisi Mintemir Shaımıev, Reseı múftıler keńesiniń tóraǵasy sheıh Ravıl Gaınýtdınov, RF ortalyq musylmandar dinı basqarmasynyń tóraǵasy Talǵat Tájýddın jáne basqa da joǵary mártebeli musylman qaýymynyń ókilderi qatysty.
Qoryq aımaǵynyń ortasyna edil bulǵarlarynyń ıslamdy resmı qabyldaýy qurmetine Eskertkish belgi ornatyldy. Úsh qabatty segiz qyrly, kúmbezdi meshit tárizdi ǵımarat ejelgi bulǵar sáýlet óneriniń naqyshymen salynǵan.
"Bul jerde 922 jyl ıslam dini erikti qabyldandy. Biz bul kúndi qasterlep este saqtaýǵa tıispiz", dedi saltanatty mıtınginiń ashylýynda Tatarstan prezıdenti R.Mınnıhanov. Edil bulǵarlarynyń ıslamdy qabyldaýy onyń aıtýynsha, aımaqtyń áleýmettik-ekonomıkalyq jáne mádenı damýyna qýatty serpin bergen.
Eskertkish belginiń basty zalyna arnaıy tuǵyrǵa ıslam mádenıetiniń basty qundylyǵy: álemdegi tasqa basylǵan eń úlken Quran qoıylǵan, onyń uzyndyǵy 2 metr, eni - 1,5 metr, qalyńdyǵy - 20 santımetr, salmaǵy - 800 kelini quraıdy. Altynmen aptalyp, baǵaly tastarmen bezendirilgen kitap shyǵys naqyshymen ádiptelgen.
Qasıetti kitapty ataqty ıtalıandyq sheberler dindar qaýymnyń qaıyrymdylyq qarajattary men demeýshilerdiń qarjysyna jarty jylda daıarlap shyqqan. Arnaıy qaǵaz Shotlandııada jasalyp, ıtalıandyq Trıesta baspahanasynda basylǵan. Mereke qarsańynda Qazandaǵy Qul Shárip meshitinde Quran-qatym túsirilip, bul kitap bastan-aıaq oqylyp, arnaıy eskortpen osynda jetkizildi.
Eskertkish zalda murajaı-kórme kesheni jasaldy.
