Tatarstanda veıp satýǵa tyıym salynady
ASTANA. KAZINFORM - Tatarstannyń Memlekettik keńesiniń Ekonomıka, ınvestıtsııalar jáne kásipkerlik komıteti respýblıka aýmaǵynda veıpter men olarǵa arnalǵan suıyqtyqtardy bólshek saýdada satýǵa bes jylǵa tyıym salý týraly zań jobasyn maquldady, dep habarlaıdy Kazinform agenttiginiń Máskeýdegi menshikti tilshisi.
Qujat respýblıka aýmaǵynda nıkotın jetkizetin elektrondy júıelerdi bólshek saýdada satýǵa tyıym salýdy kózdeıdi. Shekteý bes jylǵa, ıaǵnı 2027 jylǵy 1 naýryzdan 2032 jylǵy 1 naýryzǵa deıin engiziledi.
Bul sheshim jastardyń densaýlyǵyna veıpterdiń zııany týraly medıtsına mamandarynyń pikirin eskere otyryp qabyldandy.
Zertteý nátıjelerine sáıkes, 18 jastan asqan reseılikterdiń 62%-y temeki shegip kórgen, onyń ishinde nıkotıni bar balama ónimderdi paıdalaný tájirıbesi de bar.
Saýalnamaǵa qatysqandardyń 31%-y temeki jáne quramynda nıkotın bar ónimderdi tutynady. Veıp paıdalanýshylardyń úlesi 9%-dy quraıdy. Bul kórsetkish iri qalalardyń turǵyndary men 35 jasqa deıingi azamattar arasynda joǵary. Kámeletke tolǵan reseılikterdiń 21%-y veıp qoldanyp kórgen.
Óńirlik shekteýler engizýge Reseı prezıdenti qol qoıǵan federaldyq zań quqyqtyq negiz boldy. Ol 2026 jylǵy 1 qazanda kúshine enip, Reseı Federatsııasynyń sýbektilerine veıpterdi bólshek saýdada satýǵa tyıym salý quqyǵyn berdi.
Osyndaı tyıym Perm ólkesinde de engizildi. Qyrkúıek aıynyń sońynda Ýdmýrtııa da osyndaı sheshim qabyldady. Onda da shekteýler 2027 jylǵy 1 naýryzdan bastap kúshine enýge tıis.
Reseı úkimeti janyndaǵy áleýmettik saladaǵy qamqorshylyq máseleleri jónindegi keńestiń «Densaýlyq saqtaý jáne salaýatty ómir salty» sektsııasynyń qatysýshylary quramynda nıkotın bar ónimderdiń jekelegen túrleri men temekiniń balama ónimderin satýǵa urpaqtyq tyıym engizý múmkindigin qarastyrýdy usynǵan bolatyn.
Osyǵan deıin Qazaqstanǵa 500 mln teńgeniń veıpin zańsyz ákelmek bolǵandar ustalǵany týraly jazdyq.
