Tatarstanda prezıdent R. Mınnıhanovtyń qatysýymen Aq meshit kesheni ashyldy
ASTANA. 12 maýsym. QazAqparat - Keshe, 11 maýsym kúni Bolgar qalasynda Volga Býlgarııasynyń ıslamdy resmı qabyldaǵanyna bir jyl tolýyn merekeleý aıasynda Aq meshit kesheniniń saltanatty ashylýy boldy.
Bul týraly Qazan qalasy meriniń resmı saıtynda habarlandy.
Saltanatty rásimge Tatarstan Prezıdenti Rýstam Mınnıhanov, TR Memlekettik keńesshisi Mintemir Shaımıev, respýblıkanyń Premer-mınıstri Ildar Halıkov, Qazannyń meri Ilsýr Metshın, Islam yntymaqtastyǵy uıymynyń bas hatshysy Ekmeleddın Ihsanoǵly, sondaı-aq Reseı musylman dinbasylarynyń kóshbasshylary qatysty.
Aq meshit kesheni murajaı-qoryqtyń ońtústik qaqpasynyń janynda, Bolgarǵa kireberis jolda ornalasqan. Múftıdiń rezıdentsııasy, medrese men ǵıbadathanadan turatyn meshit kesheni 88 baǵanasy bar arkadamen jıektelgen. Onyń ortasynda fontan ornalasqan. Aldaǵy ýaqytta meshittiń aınalasyna jemis-jıdekter baqshasyn, gúl baǵyn jáne kóldi ornalastyrý kózdelip otyr.
Meshittiń eki munarasynyń bıiktigi 46,5 metrdi quraıdy, basty kúmbezdiń dıametri - 10 metr, kúmbezdiń meshit ishindegi bıiktigi 17 metr. Meshittiń qabyrǵalary dástúrli dekoratıvti naqyshtarmen jasalǵan.
Meshittiń qurylysy ınvestorlardyń esebinen júrgizildi - «Metalloınvest» holdıngi, «Ýkraınany damytý» qaıyrymdylyq qory, «Tatmunaı» AAQ jáne Islam yntymaqtastyǵy uıymymen.
Aq meshit kesheniniń ashylýynda sóz sóılegen Tatarstan Prezıdenti Rýstam Mınnıhanov: «Barshamyz Bolgardaǵy bul qasıetti nysannyń kýási bolyp otyrmyz. Biz búgin meshitti ashýdamyz. Mundaǵy isterdiń barlyǵy meıirimdilik, dostyq pen kelisim maqsatynda jasalyp jatqanyna senimdimin», - dep atap ótti.
Saltanatty sóz sóıleýlerden keıin qurmetti meımandar meshittiń ishin aralap kórdi. Rýstam Mınnıhanov, Mintemir Shaımıev jáne musylman dinbasylarynyń kóshbasshylary jańa ǵıbadathanada alǵashqy duǵany jasady, dep habarlady Tatarstan Prezıdentiniń baspasóz qyzmetinen.
