Tatarstanda «Han Sultan. Altyn Orda» operasynyń premerasy ótedi
ASTANA. KAZINFORM — 26 tamyzda Tatarstan Respýblıkasynyń Musa Jálel atyndaǵy Tatar akademııalyq memlekettik opera jáne balet teatrynda, gastroldik sapar aıasynda, Abaı atyndaǵy Qazaq ulttyq opera jáne balet teatry Hamıt Shanǵalıevtiń «Han Sultan. Altyn Orda» operasynyń halyqaralyq premerasyn usynady. Bul týraly Mádenıet jáne aqparat mınıstrligi málim etti.
Gastroldik sapar Qazaqstan Respýblıkasynyń Konstıtýtsııasynyń 30 jyldyǵyna oraı uıymdastyrylyp, Qazaqstan Respýblıkasynyń Mádenıet jáne aqparat mınıstrligi, Tatarstan Respýblıkasynyń Mádenıet mınıstrligi men Tatarstan Respýblıkasynyń Bas konsýldyǵynyń qoldaýymen júzege aspaq.
— Atalmysh opera Altyn Ordanyń qurylý tarıhyn baıandaıdy. Basty keıipker — Han Sultan, Altyn Ordanyń kórnekti tulǵalarynyń biri, Berke hannyń anasy, Joshy hannyń úshinshi áıeli. Óziniń aqyl-parasaty, minezi men saıası kóregendiginiń arqasynda Han Sultan Altyn Orda tarıhynda erekshe oryn alyp, óz uldaryn Joshy ulysynyń beldi tulǵalarynyń qataryna qosty, — delingen habarlamada.
Altyn Ordanyń murasy — túrki halyqtaryn biriktiretin rýhanı qazyna. Sol sebepti bul operany sahnalaýǵa túrkitildes elderdiń ǵylymı ortalyqtary men ǵalymdary eleýli úles qosty. Ǵylymı keńesshi retinde Altyn Orda jáne túrkologııa tarıhyn zertteýshi ǵalymdar tartyldy.
Al tarıhı oqıǵanyń jelisin saqtaý úshin Qazaqstan, Tatarstan, Túrkııa elderinen mamandar shaqyryldy. 2024 jyldyń qarasha jáne jeltoqsan aılarynda «Han Sultan. Altyn Orda» operasy Abaı atyndaǵy Qazaq ulttyq opera jáne balet teatry Ystanbul qalasy, Atatúrik mádenıet ortalyǵynda anshlagpen sahnalap, kórermenniń ystyq yqylasyna bólendi. Bul qoıylym túrki áleminiń mádenı murasyn kópshilikke pash etip, elder arasyndaǵy rýhanı, mádenı baılanystardy kúsheıteri sózsiz.
Buǵan deıin habarlanǵandaı, Marııa Mýdrıak Qytaıdaǵy gastroldik týryn aıaqtady.