Tatarstanda «Boıngtiń» apatqa ushyraýyna baılanysty qaraly kún jarııalandy
ASTANA. 18 qarasha. QazAqparat - Tatarstanda búgin, 18 qarasha Kazan áýejaıyndaǵy apattan qaza bolǵandarǵa baılanysty qaraly kún bolyp jarııalandy.
Qaıǵyly oqıǵa saldarynan 50 adam qurban boldy.
Respýblıkanyń qalalary men aýyldarynda memlekettik týlar túsirilip, kóńil kóteretin sharalar men baǵdarlamalar toqtatyldy. Pravoslav shirkeýleri, monastyrlar men musylman meshitterinde Qudaıǵa jalbaryný, qaza bolǵandarǵa arnap duǵa oqý sharalary ótip jatyr, dep habarlady ITAR-TASS.
Tatarstan mınıstrler kabınetine áýe apatynan qaza bolǵandardyń otbasylaryna kómek kórsetý boıynsha usynysty daıyndaý tapsyryldy. Apattan qurban bolǵandardyń otbasylary men týystaryna respýblıkanyń rezerv qorynan 1 mln. rýblden bólinedi.
«SOGAZ» saqtandyrý agenttiginiń ókili árbir qaza bolǵan adam úshin olardyń otbasylaryna 2 mln. 25 myń rýbl saqtandyrý járdemaqysy beriletindigin málim etti.
«Boıng» Domodedovodan jergilikti ýaqyt boıynsha 18:25-te ushyp shyqqan. 19:26-da qoný kezinde ushaq jerge soǵylyp, jarylǵan.
Ushaq bortyndaǵy 44 jolaýshy men 6 ekıpaj múshesiniń bári qaza tapty. Olardyń arasynda Tatartstan prezıdentiniń balasy Irek Mınnıhanov pen respýblıka boıynsha FQQB basshysy Aleksandr Antonov bolǵan.
Qazan áýejaıyna Tatarstan basshysy Rýstam Mınnıhanov bardy.
Ajal qushqan barlyq adamdardyń máıitteri tabyldy, tergeýshiler laınerdiń qulaǵan jerin qarap jatyr.
