Tatarstan ókilderi aqtóbelikterdiń et klasterin damytý tájirıbesin úırenbek
AQTÓBE. QazAqparat - Tatarstan ókilderi aqtóbelikterdiń et klasterin damytý tájirıbesin úırenbek. Olar jýyrda Aqtóbe oblysyna jumys saparymen kelgen bolatyn, dep habarlaıdy oblys ákimdiginiń baspasóz qyzmeti.
Delegatsııa quramynda memlekettik organdar men mýnıtsıpıaldy aýdandar jáne agroónerkásip kásiporyndarynyń basshylary bar. Sapardyń basty maqsaty-«Aktep» JShS-nyń bazasynda qurylǵan Aqtóbe et klasteriniń jumys tájirıbesin zerdeleý.
Búginde atalmysh kásiporyn asyl tuqymdy mal asyraýmen aınalysady jáne kásiporynnyń 11 myń bas iri qara malǵa arnalǵan bordaqylaý alańy bar. Sondaı-aq kásiporynda qýaty jylyna 7200 tonna ónim shyǵarýǵa qaýqarly et óńdeý kesheni jumys istep tur. Klaster oblystaǵy 350 sharýa qojalyǵymen yntymaqtastyqta jumys isteıdi. Bul seriktestik qarapaıym fermerler úshin asa yńǵaıly bolyp otyr. Óıtkeni osy yntymaqtastyqtyń arqasynda olar mol kólemde qarjy tartpastan-aq sharýashylyq aýqymyn keńeıtip, analyq maldyń basyn kóbeıtip, mal tuqymyn asyldandyryp otyr. Turaqty ónim ótkizý naryǵy da bar.
Osy sapar aıasynda Aqtóbe oblysynyń ákimi Berdibek Saparbaev pen QR Aýyl sharýashylyǵy mınıstrliginiń jaýapty hatshysy Asyljan Mamytbekov, tatarstandyq delegatsııa basshysy, Tatarstan Respýblıkasy Premer-Mınıstriniń orynbasary, Aýyl sharýashylyǵy mınıstri Marat Ahmetovpen kezdesti.
«Aqtóbe oblysy men Tatarstan Respýblıkasy mádenı-gýmanıtarlyq salada tıimdi yntymaqtastyq ornatqan. Naqtyraq aıtqanda, bıylǵy jyly «Baqytty bala» jobasynyń aıasynda tuńǵysh ret bizdiń oqýshylar Qazan qalasynda demalyp, tsıfrlyq tehnologııalar salasynda bilimderin jetildirýge múmkindik aldy. Bizge endi bunymen shektelip qalmaı, saýda-ekonomıka baǵytynda da qarym-qatynastardy jetildirý kerek. Bizde yntymaqtastyqty qajet etetin salalar jeterlik, solardyń biri aýyl sharýashylyǵy salasy»,-dedi B.Saparbaev.
Óz kezeginde Marat Ahmetov qazaqstandyq tarapty jyly qarsy alyp, «Aktep» JShS-nyń jumysymen tanysýǵa múmkindik jasaǵany úshin alǵysyn bildirdi.
«Máskeýde Qazaqstandaǵy, naqtyraq aıtqanda Aqtóbe oblysyndaǵy et klasterin damytý tájirıbesi týraly estidik. Osy keńesti paıdalanyp Qazaqstanǵa kelip, tájirıbe almasyp qaıtý qajet dep sheshtik. Endi klaster jumysymen tanysqan soń aıtarym, bul tek bıznes-joba ǵana emes, sonymen qatar myqty áleýmettik joba deýge de bolady. Óıtkeni klasterdiń óziniń jeke óndirisimen qatar, mal bordaqylaý alańy men 350 áriptes sharýashylyqtary da bar. Biz úshin bul óte qyzyqty joba bolyp otyr. Qazaqstannyń memlekettik qoldaý tájirıbesin eskere otyryp, biz bul tájirıbeni Tatarstanda da damytatyn bolamyz»,-dep tap kórsetti M.Ahmetov.
Tatarstan Reseıdiń iri sýbektileriniń biri. Іshki jalpy ónim kólemi jóninen ol Reseı Federatsııasynda 3-shi orynda tur.
