Tatarstan mektepterinde Altyn Ordanyń 750 jyldyǵyna qatysty sabaqtar ótedi

QAZAN. QazAqparat - Tatarstan mektepterinde Altyn Ordanyń 750 jyldyǵyna arnalǵan sabaqtar ótedi. Bul týraly TR Ǵylym akademııasy Tarıh ınstıtýtynyń janyndaǵy Altyn Orda jáne tatar handyqtaryn zertteý ortalyǵynyń basshysy, tarıh ǵylymdarynyń kandıdaty Ilnýr Mırgaleev aıtyp berdi, dep habarlaıdy «QazAqparat» HAA «Tatar-ınform» agenttigine silteme jasap.

«Bilim mınıstrligine oqytýshylarǵa arnalǵan oqý quralyn ázirlep berdik. Tarıh pániniń oqytýshylary osy kúnge arnalǵan sabaq ótýi tıis. Biz olarǵa memleket tarıhynyń asa mańyzdy oqıǵalary qamtylǵan qysqasha aqparatty jiberemiz», - dedi ol.

Tarıhshynyń sózine qaraǵanda, ádistemelik quralda Altyn Orda tarıhyndaǵy negizgi oqıǵalar men tulǵalar atalady, ári osy taqyrypqa qatysty usynylatyn kitaptardyń tizimi beriledi.

«Bilim berý júıesi osy aqparatty turǵyndarǵa jetkizýde bizge kómektesedi dep úmittenemiz. Óıtkeni bul tek oqýshylarǵa ǵana emes, ata-analarǵa da qyzyqty. Konferentsııalar, ashyq sabaqtar ótkizýge bolady. Tarıh pániniń bir sabaǵyn dál osy taqyrypqa arnaýǵa da bolady. Mektepter kóptegen sharalardy ótkizedi, jurt tatar tarıhyna, tatar memlekettigine arnalǵan sharalardyń mańyzyn tolyq túsinedi dep senemiz», - deıdi Ilnýr Mırgaleev.