Tatarstan basshysy qostanaılyqqa kólik tartý etti

Qazaqstanda osymen 13-ret dýmandatylyp otyrǵan respýblıkalyq sharaǵa Tatarstan prezıdenti Rýstam  Mınnıhanov arnaıy delegat bastap keldi.  Elimizdiń túkpir-túkpirinen kelip qatysqan tatarlar da orta toltyrdy.   

Sabantoı - eńbeksúıgish eldiń yntymaǵynyń, jomarttyǵynyń nyshany ispetti merekesi. Bir shańyraq astynda turyp jatqan ulttardyń birligin bekemdeı túsetin kóńildi dýman. Beıbitshilik pen dostyq meıramy. Bıyl bul toıdyń Tobyl óńirinde ótkizilýi mádenı-rýhanı ǵana emes, Tatarstan men Qostanaı oblysy arasyndaǵy ekonomıkalyq qatynastyń nyǵaıýyna sebepker bolady.

Bul týraly bas meıman R.Mınnıhanovpen kezdesý ótkizgen óńir basshysy Arhımed Muhambetov atap ótti. Dóńgelek ústel basyndaǵy keń aýqymdy otyrysta baýyrlas eldiń ókilderine, kórshiles oblystardaǵy dıaspora múshelerine sóz berildi. Olar qatysýshylarǵa quttyqtaý lebizderin joldap, atalmysh sharanyń mán-mańyzyna toqtaldy. Munan soń R.Mınnıhanov at basyn "Agromash Holdıng" AQ-na burdy. Ol jerde zaýyttyń tynys-tirshiligimen, kólik qurastyrý alańynyń jumysymen, biregeı ónimderimen jan-jaqty tanysty. Astanada ótip jatqan EKSPO-2017 halyqaralyq kórmesine qoıylǵan elektromobıldiń tizginine otyryp, tokpen júretin kólikti synap kórdi.

Jaqsy baǵasyn berip, tańdanǵan Tatarstan basshyna tosynsyı jasaldy. Kompanııa basshylyǵy qurmetti meımanǵa bir elektromobıldi tartý etti. Mereke aýyly Tobyl jaǵalaýyndaǵy "Táýelsizdiktiń 25 jyldyǵy" saıabaǵy mańyna ornalastyrylypty. Oń jaq beti - qaz-qatar kıiz úıler. Olardy oblysqa qarasty barlyq aýdandar ákelip tikken. Qazaqtyń ulttyq salt-dástúrleri, turmys-tirshiligi, yrym-joralǵylary men oıyn-saýyǵy osy mańnan kórinis tabady. Aq úılerdi aýlalaı ótken oblys ákimi men Tatarstan basshysy ashyq aspan astyndaǵy basty sahnany betke aldy. Bul jerde baýyrlas eldiń áni men bıi toı kórigin qyzdyryp jatty. Kórermender qarasy qalyń, ıne shanshar jer joq.

Jalpyhalyqtyq meıramǵa bergisiz dese de bolatyndaı. Ony quttyqtaý lebizin aıtýǵa el aldyna shyqqan qos basshy da sózderine ózek etti. A.Muhambetov pen R.Mınnıhanovtyń qolynan óńirdiń damýyna ár sala boıynsha óz úlesterin tıgizip júrgen tatar ultynyń birqatar ókili alǵys hattar aldy. Munan soń Tatarstannan kelgen ónerpazdar kórermenderge kontserttik baǵdarlama usyndy. Al sahnanyń sol jaq betine tatar aýyly qonys tepken. Aǵash úıler aldynda olardyń ulttyq mýzykasy bebeý qaǵady. Merekelik kóńil-kúıdi sezdiretin oıyn-saýyq tus-tusta jalǵasyp jatyr. Aýyldy aralaı júrip, olardyń ulttyq taǵamdary, ádet-ǵurpy, turmys-tynysynan málimet alýǵa bolady. Baǵanaǵa órmeleý, bórene ústimen júrý tárizdi oıyndardan da jarys ótýde.

Eń aıtýlysy - "Kýresh" básekesi boldy. Tatarstan basshysy júldege "Lada" jeńil kóligin tikken bolatyn. Ol Shymkentten kelgen bilekti jigitke buıyrdy.