Tatarstan arhıvi Birjan men Sara aıtysy jınaǵynyń kóshirmesin Astana muraǵatyna tabys etti
«Tatar men qazaq halqynyń arasynda ejelden saıası, ekonomıkalyq jáne mádenı baılanys ornaǵan. Tarıhta bizdiń ata-babalarymyzdyń bir memlekettiń astynda ómir súrgen kezeńderi de bolǵan. XIII-XIV ǵasyrlarda Edil boıy men Qazaqstan aýmaǵy Uly Joshy ulysynyń, áıgili Altyn Ordanyń quramyna kirgeni barshaǵa málim. Osyǵan oraı, Tatarstan Respýblıkasy Memlekettik arhıvi qazaq halqynyń mádenıeti, etnografııasy týraly zertteýler qoryna baı», - dep bastady sózin Gýzel Naılqyzy.
1804 jyly irgesi qalanǵan Reseıdiń shyǵys bóligindegi basty oqý ortalyǵy Qazan ýnıversıtetine Edil boıynan, Oral, Sibir, Kavkaz, sondaı-aq qazaq jerinen kóptegen bilim alýshylar keldi.
«Qazirgi tańda bizdiń arhıvte 30 qyrǵyz-qazaq stýdentiniń jeke paraǵy saqtaýly tur. Olardyń arasynda tanymal memleket jáne qoǵam qaıratkerleri, ǵalymdar bar», - dep atap ótti Tatarstannan kelgen tarıhshy.
Onyń aıtýynsha, Jalpyreseı musylman seziniń belsendi qatysýshysy, Bókeı ordasynan saılanǵan Alashorda múshesi - Ýálıthan Tanashevtyń derekteri Qazan ýnıversıtetinde saqtalǵan.
«Onyń jeke paraǵynda 1908 jyly tamyzda Qazan ýnıversıtetiniń medıtsına fakýltetine oqýǵa túsý úshin jazǵan ótinishi, Astrahan gımnazııasyn bitirgeni týraly attestaty, sýreti bar. Sondaı-aq, Tanashevtyń esiminiń qate jazylýyna baılanysty, atap aıtqanda, oqýǵa túskende «Ývalı», al kýáligi «Valıdhan» esimine berilgeni týraly hat almasýlar saqtalǵan. Sondaı-aq, Qazaqstannyń taǵy bir týmasy - Alashorda úkimetiniń múshesi, Torǵaı oblysynan saılanǵan Memlekettik Dýmanyń І jáne ІІ shaqyrylymynyń múshesi, zańger, «Alashorda úkimetiniń ádilet mınıstri» Ahmet Qorǵanbekuly Birimjanovtyń da Qazan ýnıversıtetiniń zań fakýltetinde bilim alǵany týraly málimetter bar», - deıdi Gýzel Faezova.
Onyń aıtýynsha, Ahmet Birimjanovtyń jeke paraǵynda «tabıǵatynan dara týǵan, jan-jaqty bilim alýshy bolǵany úshin kúmis medalǵa laıyq» ekendigi jazylǵan.
«Qazan Rýhanı akademııasynyń professory Nıkolaı Ilmınskııdiń jeke qorynda qazaq tilindegi óleńder, qazaqsha-oryssha jáne oryssha-qazaqsha sózdikter saqtalǵan. Taǵy bir tanymal túrkitanýshy ǵalym Nıkolaı Katanovtyń jeke qorynda Bókeı qazaqtarynyń ertegiler men jumbaqtar, óleńder jınaqtary kezdesedi», - dep atap ótti Tatarstan memlekettik arhıviniń qyzmetkeri.
Sóz sońynda Tatarstannyń Memlekettik arhıvi Kórme jáne pýblıkatsııa qyzmeti bóliminiń basshysy «Birjan Sal men Aqyn Sara aıtysy» óleńder jınaǵynyń kóshirmesin Astana qalasynyń memlekettik muraǵatyna tabys etti.
