Tasjol jıegindegi qum men qıyrshyq tas qalaı tazartylady
ASTANA. KAZINFORM – Qazaqstannyń respýblıkalyq mańyzy bar avtomobıl joldarynda jol jıegin qumnan, topyraqtan, usaq qıyrshyq tas pen ózge de qaldyqtardan tazartý úshin arnaıy elevatorlyq úlgidegi sypyrý-jınaý tehnıkasy qoldanylady, dep habarlaıdy QazAvtoJol.
Mamandardyń aıtýynsha, jol jıeginiń tazalyǵy tek joldyń syrtqy kórinisine qatysty másele emes. Ol jol tańbalarynyń anyq kórinýine, jol jamylǵysynyń jaı-kúıine jáne qozǵalys qaýipsizdigine tikeleı áser etedi.
«QAJservıs» respýblıkalyq mańyzy bar avtomobıl joldaryn kútip ustaý kezinde arnaıy elevatorlyq úlgidegi sypyrý-jınaý tehnıkasyn paıdalanady.
Onyń qarapaıym sypyrǵysh tehnıkadan basty aıyrmashylyǵy – jol betindegi qum men qıyrshyq tasty jol shetine ysyryp tastamaıdy. Arnaıy mehanızm qaldyqtardy jınap alyp, birden qatar júrip kele jatqan túsirgish kóliktiń shanaǵyna tıeıdi.
– Tehnıka bir júrip ótkende eni 3 metrge deıingi jolaqty tazarta alady. Onyń jumys jyldamdyǵy saǵatyna 25 shaqyrymǵa deıin jetedi, al jol betindegi qaldyqtardy jınaý ónimdiligi mınýtyna 1,2 tonnaǵa deıin barady. Jumys kezinde shań kóterilmeýi úshin bir tonnadan astam sý qory bar ylǵaldandyrý júıesi qarastyrylǵan. Mehanıkalyq jınaý júıesi jol jamylǵysynyń tegis emes ýchaskelerinde de jumys isteýge múmkindik beredi, – delingen aqparatta.
Mundaı ádis ásirese qys mezgilinen keıin tıimdi. Óıtkeni osy kezeńde jol jıegi men júrý bóliginiń shetinde qum, topyraq jáne usaq qıyrshyq tas kóptep jınalady.
Jınalǵan materıaldyń jol shetine jaı ǵana sypyrylmaı, arnaıy kólikke tıelýiniń qozǵalys qaýipsizdigi úshin de mańyzy bar. Bul usaq tas pen qıyrshyq tastyń qozǵalystaǵy kólikterge qaraı shashyraý qaýpin azaıtady.
Sonymen birge jol jamylǵysynyń shetin turaqty tazartý jol tańbalary men júrý bóliginiń shekarasyn anyq kórýge múmkindik beredi.
Jolshylar úshin mundaı tazalaý kúndelikti jumystyń bir bóligi bolsa, júrgizýshiler onyń nátıjesin taza jol jıeginen, anyq kórinetin jol tańbasynan jáne kólik qozǵalysyna kedergi keltiretin bógde zattardyń azaıýynan baıqaı alady.
Aıta keteıik, Atyraý oblysynda Mııaly–Taısoıǵan jolyn qum basyp jatyr.
