Tasymaldaýshylardyń áreketinen turǵyndar zardap shekpeýi kerek - Aqtóbe qalasynyń ákimi
«Іshki jumys tártibin rettep jatqandaryńa esh qarsylyǵymyz joq. Biraq, sizderdiń áreketterińizden qala turǵyndary zardap shekpeýleri kerek. Qanshama adam keshe avtobýs kútip, qystyń ishinde aıaldamalarda bala-shaǵasymen tońyp turdy. Avtobýstardyń birinen soń biri olardy kóre tura, toqtamaı ótip bara jatqanyna kýá boldym. Bul ne degen bassyzdyq?! Úıine, jumysyna asyqqan qala halqynyń jazyǵy nede? Biz máseleni tez arada sheshý úshin bir saǵattyń kóleminde ózge 3 tasymaldaýshy kompanııanyń avtobýstaryn baǵyttaýymyzǵa týra keldi. Árıne, olar kómekke keldi, biraq «Avtoparktiń» kesirinen óz baǵyttaryndaǵy jumysty álsiretip aldy. Bulaı jalǵasýy múmkin emes. Sondyqtan, barlyq baǵytqa erteń avtobýstaryńyz shyǵatyn bolsyn. Meniń talabym – osy», - dedi qala ákimi Murat Jórebekov.
Al, seriktestik dırektory qala ákimine barlyq 11 baǵyttyń avtobýstary jelige qosylady dep ýáde berdi.
«14 aqpan kúni tústen keıin 65 júrgizýshi barlyǵy 11 baǵyt boıynsha júretin avtobýsty toqtatty. Olar №21, 26, 24, 22, 15, 16, 3 marshrýttardyń avtobýstary. Bári kestege sáıkes jumysqa shyǵady. Keıbir baǵyttarda avtobýs sany tolyq bolmaı qalýy múmkin. Sebebi, bizdiń talabymyzǵa kónbeı, jumysqa shyǵýdan bas tartyp otyrǵan áli 10-15 júrgizýshi bar. Al jalpy, barlyq baǵytqa avtobýstar qosylady. Biz narazylyq týǵyzyp, jumysqa shyqpaı qalǵan júrgizýshilerdiń árqaısysymen jeke sóılesip, kelisimge kelip otyrmyz. Máseleni retteımiz, qala turǵyndarynan keshirim suraımyz», - dedi «Avtopark» JShS dırektory Aqarys Tileýlesov.
Eske salsaq, Aqtóbe qalasynda «Avtopark» JShS-niń jumysshylary bir sátte qyzmetin toqtatyp, tasymaldaý jumysyna kedergi keltirdi. Júrgizýshiler syıaqyny túgel berýdi, aıyppul salmaı, jalaqy kóterýdi talap etti. Kelissóz eki kúnge sozyldy.
Foto: Aqtóbe qalasy ákiminiń baspasóz qyzmeti
