Tasymaldaýshylar Kólik mınıstrliginen respýblıkalyq joldarda qoıylatyn maýsymdyq shekteýlerdi qaıta qaraýdy ótinýde
ASTANA. 30 naýryz. Qazaqparat - QR Kólik jáne kommýnıkatsııa mınıstrligi Kóliktik baqylaý komıtetiniń tóraǵasy Baqyt Ábishev avtokólikterine artyq júk tıegenderi úshin «Qyzyljar» kóliktik baqylaý beketinde toqtatylǵan júk tasymaldaýshylarmen kezdesti.
Mınıstrlik baspasóz qyzmetiniń aqparatyna sáıkes, keıbir kólikterdiń jalqy biligine túsken júk salmaǵy 14 tonnadan asyp ketken. Al, bilikke túsetin júk salmaǵynyń ruqsat etiletin mólsheri Qazaqstanda, sondaı-aq Ázirbaıjan, Túrkııa, Reseı, Germanııa elderinde 10 tonnany quraıdy. Kóktem mezgilinde bul mólsher Qazaqstanda 8 tonna dep bekitilgen. Mundaı maýsymdyq shekteýler Reseı Federatsııasynda, Belarýste jáne Eýropa elderinde qoldanylady.
Maýsymdyq shekteýler álemdik tájirıbede bar jáne Azııa elderimen qatar Eýropa memleketterinde qoldanylady. Bul klımattyq jaǵdaılardyń ózgerýine baılanysty: kóktemde erigen qar sýy, jazda joǵary temperatýra jol jamylǵysynyń tez buzylýyna sebepker bolady.
Tasymaldaýshylardyń pikirinshe, bul shekteýlerdi alyp tastaý kerek, nemese ulǵaıtý baǵytynda qaıta qarastyrý qajet.
Avtomobıl joldary komıtetiniń tóraǵasy Zamır Saǵynovtyń aıtýynsha, shekteýlerdi alyp tastaý, joldardyń tez buzylýyna jáne olardy qaıta qalpyna keltirý úshin bıýdjetten bólinetin orasan qarjy shyǵynyna alyp keledi. Mysaly, 1 shaqyrym joldy qaıta salý úshin ortasha eseppen 200-den 600 mln. teńgege deıin qarjy qajet.
Baqyt Ábishev, tasymaldaýshylar ruqsat etilgen erejelerge sáıkes zańnamany saqtaý qajet dep esepteıdi. Sebebi, avtojoldardyń negizgi jelisi zańnamada kórsetilgen júktiń salmaq mólsherine eseptelgen.
Sonymen birge, Z.Saǵynovtyń aıtýynsha, sapasy joǵary jańa joldardyń salynýyna baılanysty komıtet atalǵan kórsetkishti josparly túrde kóterýdi kózdeýde. Mysaly, «Astana- Şýche» avtobany jalqy bilikke túsetin júk salmaǵy 13 tonnany quraıtyn avtokólikterdiń qozǵalysyna eseptelgen.
