Tasymaldaýǵa ruqsat berilmeıtin qarýdyń 16 túri anyqtaldy
ASTANA. QazAqparat - QR Parlament Senaty Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda «Eýrazııalyq ekonomıkalyq odaqqa múshe memleketter arasyndaǵy qyzmettik jáne azamattyq qarýdy ótkizý týraly kelisimdi ratıfıkatsııalaý týraly» Zań jobasy qaraldy, dep habarlaıdy QazAqparat.
«Kelisimge Erevan qalasynda 2016 jylǵy 20 mamyrda Eýrazııalyq ekonomıkalyq odaqqa múshe memleketterdiń úkimet basshylary qol qoıdy. Qujat zańdy jáne jeke tulǵalardyń qyzmettik nemese azamattyq qarýdy áketýge nemese ákelýge, tranzıtteýge, ań aýlaýǵa, sporttyq sharalarǵa, jóndeý men bólshekterdi aýystyrýǵa ruqsat berýdi kózdeıdi. Eýrazııalyq ekonomıkalyq komıssııasy bekitken jospar boıynsha Іshki ister mınıstrligi zańdy tulǵalarǵa qarýdy satý úshin ákeleýge nemese áketýge, tranzıtteýge, qarýdy zertteý maqsatynda ýaqytsha alyp ketýge ruqsat beredi. Al ishki ister departamentteri jeke tulǵalarǵa qarýdyń bir ǵana danasyn berýdi, ony jóndeý úshin ýaqytsha alyp ketýge ruqsat etedi.
Sondaı-aq, Eýrazııalyq ekonomıkalyq odaqqa múshe barlyq memleketterge tyıym salynǵan jáne satýǵa shekteý qoıylǵan azamattyq, qyzmettik qarýlar bar», - dedi Zań jobasy boıynsha baıandama jasaǵan QR Іshki ister mınıstriniń orynbasary Erlan Turǵymbaev.
Osy rette tasymaldaýǵa tyıym salynǵan 16 jáne ruqsat berilgen 34 qarýdyń ataýy bar.
«Tyıym salynǵandar arasynda qarýmen qatar, oq-dáriler qamtylǵan. Osy oraıda oq-dárilerdiń ishinde qurysh buzar jáne jarqyraǵysh oqtarǵa shekteý eskerilgen. Al qarý boıynsha myltyq uńǵysynyń uzyndyǵy men avtomatty qarý-jaraqqa shekteý bar», - dedi mınıstrdiń orynbasary.
Kelisim qyzmettik jáne azamattyq qarýdy ótkizý men onyń ishki tranzıtine baılanysty qatynastardy, sondaı-aq Eýrazııalyq ekonomıkalyq odaqqa múshe memleketterdiń ókiletti organdary arasynda osyndaı ótkizý men ishki tranzıtti memlekettik baqylaýǵa baılanysty máseleler boıynsha ózara is-qımyl jasaýdy retteýge baǵyttalǵan. Eýrazııalyq ekonomıkalyq komıssııa bekitetin nysan boıynsha biryńǵaı qujat negizinde mindetti ruqsat berý tártibi belgilengen. Kelisimdi ratıfıkatsııalaý osy qarý túrin EAEO-ǵa qatysýshy elderdiń aýmaǵynda ótkizýdi ońaılatýǵa, naqty aıtqanda qarýdy ákelý jáne áketý úshin ruqsat berý qujattaryn berý merzimin qysqartýǵa múmkindik beredi.
Zań jobasy Palatanyń qaraýyna jiberildi.
