Tasyǵan Jaıyq 7 han jerlengen Saraıshyqtaǵy jumysty toqtatyp tastady
Jaǵany bekitýmen aınalysyp jatqan bas merdiger "AIS-Astana" kompanııasynyń ókili Asqar Tólenovtiń aıtýynsha, jumystyń ýaqytsha toqtaıtyny áýel basta belgili bolǵan, sondyqtan bul kidiris 2018 jyly aıaqtalýy kerek jobanyń uzaqtyǵyna áser etpeıdi. Ol jumystyń úsh kún buryn toqtaǵanyn aıtty.
Sý resýrstaryn paıdalanýdy retteý jáne qorǵaý jónindegi Jaıyq-Kaspıı basseındik ınspektsııasynyń basshysy Ǵalıdolla Ázıdýllınniń aıtýynsha, búgin Jaıyqtaǵy sý deńgeıi 365 santımetr kóterilip, 672 santımetrge jetti. Al aımaqtaǵy qaýipti deńgeı - 850 santımetr. Ǵalıdolla Ázıdýllın sýdyń bul qaýipti kórsetkishke jetpeıtinin boljap, tilsiz jaýdyń maýsym aıynyń basynda qaıta bastaýy múmkin ekenin aıtty.
Al, bas merdiger kompanııa ókili barlyq qaýipsizdik sharalarynyń jasalǵanyn jetkizdi.
"Jumysty toqtatpas buryn jaǵaǵa topyraq salynǵan qapshyqtardy tizip qoıdyq. Buny tolqynnyń jarǵa soǵýyn barynsha báseńdetý úshin jasadyq", - deıdi ol. Ókildiń aıtýynsha, sý qaıtqan soń mamandar qaıta iske kirisedi.
Asqar Tólenov tıisti 6000 sharshy metr betonnyń úshten biriniń quıylyp úlgergendigi jetkizdi.
Aıta ketelik, byltyr Atyraý oblysynyń ákimdigi 1,5 mıllıard teńge qarastyryp, kóne shahardy shaıyp bara jatqan Jaıyq ózeniniń jaǵasyn bekitýdi bastady. Odan keıin Mádenıet jáne sport mınıstrligi ejelgi qalany qalpyna keltirý úshin taǵy 100 mıllıon teńge bóletinin málimdedi. Saraıshyq qalasyn týrıstik ortalyqqa aınaldyrý úshin kásipkerlerdi tartý josparlanyp otyr.
Kóne shahar Atyraý qalasynan 45 shaqyrym jerde Jaıyq ózeniniń jaǵasynda ornalasqan. Altyn orda handyǵynyń saıası, ekonomıkalyq ortalyqtarynyń biri bolǵan qala Qasym hannyń tusynda Qazaq handyǵynyń astanasy atandy. Jibek jolynyń boıynda turǵan munda 7 han jerlengen. Olar: Móńke, Toqtaǵý, Jánibek, Ámir Oqas, Qasym han, Shıh Mamaı jáne Júsip handar.
Baıan Januzaqova
