Tasyǵan sý batystaǵy taǵy bir respýblıkalyq tasjoldy shaıyp ketti
«QazAvtoJol» málimeti boıynsha oqıǵa 1 sáýir kúni saǵat 17.30-da Samara-Shymkent jolynyń 479-shaqyrymynda Qaratóbe aýdany Qoskól aýyly tusynda boldy.
Kúrt erigen qar sýy avtojoldan asyp ketken.
Atamysh mekeme kúshimen sý tasqynyna qarsy kúres sharalary júrgizildi. «Avtojol jıeginiń boıyna qum salynǵan qaptar men eskertý belgileri qoıyldy.
Tıisti tehnıkalar tartylyp, táýlik boıy kezekshilik uıymdastyryldy. 2 sáýirde tańǵy saǵat 05.00-de sý tasqyny toqtady, osy tustaǵy qubyr 60 paıyzǵa jumys istep tur. Jaǵdaı baqylaýda. Respýblıkalyq mańyzy bar Samara-Shymkent tas joly ashyq», dep habarlady vedomstvodan.
BQO TJ departamentiniń baspasóz qyzmeti oqıǵany rastap, qazirgi kezde qalpyna keltirý jumystary júrgizilip jatqanyn jetkizdi. Kólik qozǵalysy toqtaǵan joq.
Buǵan deıin habarlanǵandaı, Aqtóbe oblysynda tasyǵan sý respýblıkalyq mańyzy bar joldy jyryp ketken bolatyn.
