Tastandy náreste, órtten qutqarylǵan naýqastar: pavlodarlyq medbıke 40 jylǵy tájirıbesindegi erekshe oqıǵalardy eske aldy
- Sandýǵash hanym, medıtsına salasynda jumys istep júrgenińizge neshe jyl boldy?
- 40 jyl. 1982-de medıtsınalyq kolledjdiń keshki bólimine oqýǵa tústim. Sodan beri jumys istep kelemin. Ol kezdegi talap boıynsha keshki bólimde oqıtyndar mindetti túrde jumys isteýi kerek edi. Qazir ózim jumys istep júrgen aýrýhana ǵımaratyn salýǵa da atsalystyq. Jumystan bosaı qalsaq, keramzıt, terezeler tasyp, ǵımarattyń ishin tazalaıtynbyz.
- Osy ýaqyt ishinde alǵystyń túr-túrin estigen shyǵarsyz?
- Iá, árıne, rızashylyq bildirgen analar kóp. Sondaı-aq, gramotalar, alǵys hattar da aldym. Bul - meniń jumysym, ıaǵnı qalypty mindetim ekeni túsinikti. Ol úshin alǵys kútpeımin. Biraq, keıde analar erekshe rahmet aıtyp jatady. Mysaly, balaǵa kateter salamyz. Ony kórip turý anasyna ońaı emes. Mine, mundaıda ıneni eppen egý bylaı tursyn, anasynyń kóńilin de jaılandyrý kerek bolady. Ókinishke qaraı, qazir aýrýhanaǵa tabany tımeı jatyp, narazylyq bildiretin analar kóbeıip ketti.
- Este qalǵan oqıǵalar kóp shyǵar?
- Ondaı jaǵdaılar óte kóp. Bizge tastandy balalar jıi túsetin. Sondaı sábıdiń biri - Janna degen bala esimde... Balalar úıine jibergenshe aıaǵyn basa almaı júrdi. Tez júrip ketýi úshin massaj jasaıtynbyz. Birde ol qabyrǵa jaǵalaı júrip, aýrýhana meńgerýshisine bardy. «Anashym, anashym, olar meni renjitip júr. Tamaqty tolyq bermesten uıyqtatyp tastaıdy», - dep shaǵymdandy. Kózimnen jas parlaǵany esimde. Janna boıjetkenshe habarlasyp turdyq. Keıin ol turmys qurǵan soń, aradaǵy baılanys úzilip qaldy.
Taǵy bir jaǵdaı esimde. Bizdiń aýrýhanaǵa bir jas dáriger sábıimen tústi. Ekeýi ońasha bólmede jatatyn. Bir kúni balasynyń qımylsyz qalǵanyn aıtyp, daýystap jylady. Júgirip baryp, alǵashqy kómek kórsettim. Balanyń boıyna jan kire bastady. Qazir sol bala 20-ǵa keldi. Áli kúnge deıin alǵys aıtyp, habarlama jazyp turady. Ózi aımaqtyq densaýlyq saqtaý qurylymynda jumys isteıdi.
- Tastandy balalar jıi túsetin dedińiz...
- Iá, kóp bolatyn. Dalada qalǵan balany birden bizge ákeledi. Ol tekserýden tolyq ótpeı balalar úıine jiberilmeıdi. Kóbin áriptesterimiz asyrap aldy. Qazir tastandylardyń sál de bolsa azaıǵany qýantady.
- Osy mamandyqty tańdaǵanyńyz úshin ókingen kezder boldy ma?
- Aılyqtyń az ekenin sezingende ókinetin kezder bolady. Koronavırýs juqtyrǵan naýqastardy emdegen kezde ústemeaqy tólengenin bilesiz. Onyń ózi úsh aıǵa ǵana berildi. Jýyrda balama úı alyp berý úshin zeınetaqy qoryndaǵy jınaǵymdy paıdalanǵym keldi. Biraq, 40 jyl ishinde 3 mln. teńge de jınalmaǵan eken. Ókinishti-aq, árıne... Jalaqymyz mysqaldap, baǵa bolsa batpandap ósip jatyr.
- Jumys barysynda basqa qandaı qıyndyqtar bolady?
- Medıtsınalyq buıymdar tapshy. Odan keıin maman turaqtamaıtyn bolyp ketti. Buryn ujymda aýys-túıis sırek bolatyn. Qazir kún saıyn biri kelip, biri ketip jatady. Basshylar da jas mamandardy ustap qalýǵa tyryspaıdy. «Unamasa, ótinish jaz da ket ber» dep qarap otyrady.
- Jýyrda siz jumys isteıtin aýrýhanada órt bolǵanyn bilemin. Ol kezde jumysta boldyńyz ba?
- Iá, men kezekshilikte edim. Óte qorqynyshty boldy. Ásirese, demikpesi bar balalarǵa qaýipti edi. Órt túnde shyqty. Naýqastardyń bári uıyqtap jatqan. Kenet emdeý bólmesinde jaryq sónip, 15 mınýttaı qarańǵylyq ornady. Osylaısha birneshe ret jypylyqtap turdy. Kerneýdiń qubylýyna shydamasa kerek, palatalardyń birinde sham órtengen. Bólimdi qara tútin basyp, kúıik ısi keýlep ketti. Dálizde abyr-sabyr bastaldy. Palatalardyń esigin ashyp, analarǵa jol siltep júrmiz. Bári shyqty-aý degende tizim boıynsha tekserip óttik. Bul kezde jedel járdem brıgadasy da jetken bolatyn.
- Sol sátte eń birinshi qandaı oı keldi?
- Eń bastysy, bárin qaýipti aýmaqtan aman alyp shyǵý edi. Meniń bólimshemde 20 adam bolǵan. Osyndaı tórt bólim bar. Áıteýir bárin shyǵaryp úlgerdik.
- Zardap shekkender boldy ma?
- Eshkim zardap shekken joq. Jyldam ári úılesimdi qımyldaı bilgen sııaqtymyz. Tótenshe jaǵdaılar kezinde qalaı áreket etý kerektigin úırengenbiz. Ondaı nusqaýlyqtar únemi júrgizilip turady.
- Áńgimeńizge rahmet. Alǵys arqalaı berińiz!
