Tastandy bolǵan 11 aılyq sábıdi týystary asyrap alǵysy keledi
AQTÓBE. QazAqparat - Aqtóbede qaraýsyz qalǵan 11 aılyq balany naǵashylary asyrap alǵylary keledi.
Eske sala keteıik, buǵan deıin kishkentaı sábıdiń qaladaǵy jataqhanalardyń birindegi dálizden tabylǵany aıtylǵan edi , dep habarlaıdy QazAqparat tilshisi.
Týysqandary Nınadan bas tartpaǵandaryn aıtyp otyr. Kerisinshe, ishimdikke jaqyn anasyna sabaq bolsyn dep polıtseılerdi ózderi shaqyrǵan.
«Nına - meniń úlken apamnyń qyzy. Ol sábımen birge ýaqytsha bizben turyp jatyr. Jańa jyldan beri ishimdik ishýin qoıatyn emes. Sosyn shara qoldansyn dep polıtsııaǵa ózimiz aryzdandyq. Inspektorlar kelip eskertý jasaǵanymen, nátıje bolmady. Keıin, kámeletke tolmaǵandar isi jónindegi ınspektorlar balany sábıler úıine alyp ketpeıinshe, Nınanyń anasyna shara qoldaný múmkin emes ekendigin túsindirdi. Balany jataqhananyń dálizine tastaǵan eshkim joq. Osy jerde bizden aryzdy jazyp alyp, dárigerlerdi shaqyryp baryp, balany alyp ketti. Keıin aýrýhanaǵa da izdep bardyq, kórsetpedi, bermedi»,- deıdi Nına Horenkonyń naǵashy apasy Vıktorııa Horenko.
Vıktorııanyń aıtýynsha, qazir sábıdi naǵashy aǵasy qamqorlyǵyna alýǵa ázir. Onyń otbasy, basynda baspanasy bar. Qyz balany asyraýǵa shamasy keledi.
Alaıda, Nına Horenkonyń ári qaraıǵy taǵdyryn balanyń quqyǵyn qorǵaý jónindegi komıssııa sheshetin bolady. Qazir balasyn qaraýsyz qaldyrǵan áıeldiń ústinen ákimshilik is qozǵalǵan.
Zada Zeıin
