«Tastaq» bazary mańyndaǵy órt jer úıden shyqqan - Almaty TJD
ALMATY. QazAqparat - Almatydaǵy «Tastaq» bazarynyń mańyndaǵy jeke turǵyn úıden órt shyqty, dep habarlaıdy QazAqparat tilshisi qalalyq TJD baspasóz qyzmetine silteme jasap.
Jeksenbi kúni Tastaq bazary mańynda bolǵan órt týraly alǵashqy aqparat Instagram áleýmettik jelisindegi kris_p_almaty paraqshasynda paıda boldy. Keıin bul aqparatty qalalyq Tótenshe jaǵdaılar departamenti de rastady.
TJD baspasóz qyzmetiniń jetekshisi Sandýǵash Baımuhambetovanyń aıtýynsha, órt sóndirýshiler tilsiz jaýmen 1 saǵatqa jýyq arpalysqan.
«18 aqpan kúni tańǵy 07:29-da «101» pýltine Gaıdar kóshesi, 107-úıde órt shyqqany týraly aqparat kelip tústi. Órt sóndirýshiler 8 mınýttan soń - 07:37-de oqıǵa ornyna jetti. Jeke turǵyn úıdiń aýlasyndaǵy eki qabatty ǵımarattyń ekinshi qabaty men shatyry jalyndap jatty. Tilsiz jaý 08:08-de aýyzdyqtalyp, 08:31-de tolyǵymen sóndirildi. Jalyn 290 sharshy metr aýmaqty sharpydy. Japa shekkender men qaza bolǵandar joq», - dedi ol.
Jalynmen kúreske Almaty TJD qyzmetiniń 14 tehnıkasy men 44 órt sóndirýshisi jumyldyryldy.
